نيولوك....!!!

بسم الله والصلاة والسلام على سيدنا رسول الله...
اخواتى الافاضل...ربنا يبارك فى عمركم ويعز بيكم الدين..
انا النهردة حابب اشترك معاكم بالخاطرة العاشرة..

الخاطرة دى اللى عجبنى جدا اسمها..واسال الله العظيم ان يكون كمان كلامى كويس ويعجبكم..

بعد اذنكم حبدا معاكم كده بحاجة صغيرة جدا حصلت معايا...

كنت ماشى مرة فى اسكندرية بلدى..لقيت شاب جميل قطع عليا سيرى وجه يقولى ممكن اسالك سؤال ..قلتله طبعا تحت امرك...

حقولكم اللى قالى عليه بلغته يعنى...
.قالى انا عايز اعرف انت كده ازاى..
قلتله يعنى ايه مش فاهم..
قالى يعنى شاب ماركات ولابس نضيف وف نفس الوقت
شكلك ملتزم وابتسامتك على وشك...

علطول جه فى دماعى الفكرة اللى بتتاخد على الدين والملتزمين..
والحمد لله قدرت بكلمات بسيطة اوصل لقلب الولد ده...واعرفه انك لو بقيت ملتزم مش شرط انك مش حتعرف تلبس او تخرج او تعيش حياتك..
كل الحكاية انك بتبقى عارف حدودك وبتحاول ترضى ربنا...

الشاب ده فاجانى بكلمة من كلامى..وانا بقوله مش لازم كل حياتك تبقى نيولوك غلط..
.حاول تعمل مرة نيولوك صح..وضحكت بعدها...

لقيته ردد كلمتى قالى فعلا انا محتاج اعمل نيولوك...وحعمل نيولوك فى حياتى..بهرنى رد فعله ده..وكلماته الحلوة...

ايه رايك ياجميل...مش ناوى انت كمان تغير حياتك ...

مش ناوى انت كمان تعمل مرة واحدة حاجة صح...

ياما اخدنا قرارات كتيرة ولكنها للاسف كانت فى الغلط...

ياريت بقى نفوق ونحاول نعمل نيولوك صح..نيولوك اسلامى..نيولوك دينى...

انا مش بكلمك لانى احسن منك والعياذ بالله..بالعكس انا عايزك تقتنع ان التراب اللى حضرتك بتدوس عليه احسن من اللى زيى ميت مرة...

صدقنى لانك واحد بتحب ربنا وبتقرا الكلمات دى...وعايز تغير حاجة من نفسك...
انا بكلمك بس لان ليا خبرة محدودة شووية وفارق سن عنك بس..وبحكم ان ليا طلبة كتير وبتعامل معاهم..

اخى واستاذى وياللى احسن منى ميت مرة...تقدر تقولى فين شكلك الاسلامى فى لبسك ده.. والناس تعرف ازاى انك مسلم...بلاش اسلامى
علشان الارتكاريا اللى بتيجى لبعض الناس لمايسمعوا اسلامى او دينى..فين شكلك الرجولى بلبسك ده...

تخيل معايا كده...

تى شيرت حمالات ..بنطلون خفيف..شبشب صوبع..سلسلة كبيرة...شعر ملهوش ملامح ...

بذمتك ده كده واحد خارج من بيته..ياحبيب قلبى انت كده خارج بس من دش فى بيتكم..او كنت بتغسل وشك بعد النوم...

كل ده علشان ايه..تعجب البنات..ولا علشان يقولو عليك شاب روش وجامد...طيب خلينى معاك فى الغلط ده..

يااخويا ايه احساسك بذاتك لما البنت يعجبها فيك لون شعرك..ولا ستايل لبسك وتسقيطك لبنطلونك..

ماهو لو بالمنطق ده يبقى لما يجى حد تانى عامل استايل احسن منك انت خلاص حتبقى راحت عليك...

فين شخصيتك ورجولتك وكيانك..ايه كله نيولوك...

تقدر تقولى مين اللى حيجوز بنته ليك وهو شايفك كده..طيب بلاش دى..بالله عليك يااخى لو حد جه لاختك كده...
حتقول عليه ايه؟؟؟؟؟ بس جاوب بصراحة...مش حتقول عليه مينفعش...

ياحبيبى والله مش هى دى الرجولة ..ولا الحرية..ولا الشياكة..ولا الموضة...
دى بقى بلغتك كده اشتغالااااات..ايوة والله...

عيزينك ياحبيب قلبى تبعد عن دينك ..تبعد عن فطرتك..تبعد عن سنة حبيبك المصطفى صلى الله عليه وسلم...

اصل مفيش حد شاف رجال فى التاريخ زى المسلمين...وزى اللى المسلمين عملوه علشان ينشروا دينهم...
جهاد وتعذيب ودعوة ورجولة ودم حامى..

فين دمك الحامى....فين نخوتك...فين شرفك...شرف دينك وعرضك....

فووق بقى..اصحى من الغفلة اللى عايزينك تبقى فيها....

مش عيب اوى لما يكونوا اخواتنا بيدبحوا قى كل حتة..وحضرتك كل مشكلتك ان الجيل المضروب بيجيب حساسية...

لا يااخويا..انا وانت وكلنا خلاص ..مبقاش عندنا اى حساسية..مبقاش عندنا اى شعور بالمسئولية...

ادخل شوف الناس بتكتب ايه على دينك وعلى ربك وعلى نبيك....

شوف ربنا اللى قادر يخسف بينا الارض واحنا بنعصيه وسايبنا علشان خاطر بيحبنا وعايزنا...

شوف كده يوم الخميس بالليل والمصايب اللى بتحصل على وجه الارض والاماكن اللى بتبقى فيها وشايف بنفسك المعاصى..
وحتى اضعف الايمان انك تسيب المكان وتمشى مبتعملهاش...ورغم كده ربنا سايبنا....

مش هى دى الرسالة..مش هى دى الامانة...

كذبوا علينا وقالولنا موضة...كذبوا علينا وقالولنا عصرية وعولمة...كذبوا علينا وقالوا نيولوك..

واحنا مجرورين للاسف وراهم ..من غير ماحتى ندى لنفسنا فرصة فى التفكير...

[b]اديك مثال صغير على الموضة بتاعتهم اللى للاسف ناس من دمنا ولحمنا ومسلمين زينا هما اللى بينشرولهم افكارهم...

ليه لما المسلمين مشوا على سنة نبيهم وقالوا نسيب لحيتنا..دقننا يعنى..علشان نبقى شبه الرسول..
الناس كلها حاربتهم وقالت تخلف ورجعية وشكل وحش وارهابيين و و و....

ولما طلع واحد شيوعى كافر بالله...ولا واحد قال دى ستايل ايطالى...كل الناس بقت تقلده وحبايبنا يسقفولهم...
ويقولوا برافو هو ده الاستايل وهى دى الموضة...

ياسلام ع النجم ده وهو مربى دقنه...اووو شكله حلو موووت...

مش هو ده اللى بنسمعه....

ولا لما اخوك الجميل قصر بنطلونه شوية علشان حابب يبقى شكل رسوله فى التواضع وعدم الفخر.. كل الناس حاربته...

على الرغم من ان اللى هاجموه دول هما هما اللى نزلوا اشتروا البنطلونات القصيرة لما طلعت (البنتاكور)
وقالوا ياسلام على الشياكة والاناقة والجمال والموضة....هى دى الاستايلات..هى دى النجومية...

مش هو ده اللى بتسمعوه بالله عليكم..صح ولا لا..نجم قال....واحد كل اللى بيعمله انه يخلى الاالف يرقصوا وراه
ويمشوا ورا غناه ويقلدوه...بقى نجم..كل تاريخه او السى فى بتاعه ..انه بيرقص ويسقط بنطلونه ويوقف شعره بقى نجم واسطورة...

واحد بيحارب ربنا..ايوة ايوة..بيحارب ربك يااخى...

تخيل نفسك كده لو حد عزمك على حفلة للشخص ده..حتقول ايه..
حتقول ياترى ادخل ولا حراام..ادخل ولا حغضب ربنا..

يعنى ايه...يعنى فلان الفلانى ده او ربنااااا...مقارنة اهى بتختار ده ولا ده والعياذ بالله....

حط نفسه فى مواجهة مع ربنا..ومع ذلك ربنا سايبه وبيرزقه وبيديله كل اللى هو عايزه..

بذمتك مش مكسوف بقى لما تقلده..بذمتك مش خسارة الذنوب اللى بتاخدها بسببه...

مش هو ده النجم ياحبيب قلبى ..النجم هو ابو بكر..النجم هو عمر...النجم هو عثمان..النجم هو على...
النجم هو ابى ذرو ابو عبيدة.. وابى هريرة وياسر وعبد الرحم بن عوف...

مش الرسول هو اللى قال كده..قال..اصحابى كالنجوم..بايهم اقتديتم اهتديتم...صلى الله عليه وسلم...

وعندنا دلوقت نجوم كتير يتقلدوا ياسيدى علشان متقولش انا فين وهما فين الصحابة...عندك اخونا وحبيبنا مصطفى حسنى.....وعندك معز مسعود...وعندك احمد الشقيرى...حتلاقى ياماااا اوى...دول كلهم ..نجوم وشباب زيك يتقلدوا برضه..بس اى تقليد ليهم حتاخد به حسنات...
تخيل بقى الفرق....

وياسلام عليك بقى لو كبرت فى دماغك وقلت اقلد شيخنا محمد حسان مثلا ..ولا استاذ عمرو خالد...تبقى ولد بجد...

عرفت بقى مين النجم اللى يتقلد ولا لا...انت فاهم معنى كلمة نجم غلط....

عايز تبقى نجم يبقى لازم تكون نجم واضح تاخد بايد الناس وتساعدهم على الخير..

هو ده النجم..النجم هو اللى بيهدى..مش هو اللى بيضل..ده جى من اسمه ياخى..نجم..يعنى بينورلك طريقك...
مش بياخدك وينزل بيك لسابع ارض..

مش ربنا قال تعالى..وبالنجم هم يهتدون....

فوق بقى يااخى عايز كده تحس بالمسئولية..وتعرف ان ليك رسالة مادام ربنا خلقك...

ارفع بقى بنطلونك..واستر نفسك..ده ربنا سترك...
خاف على دينك..واعمل حاجة صح..ده ربنا سترك...
اوعى تمشى ورا نجم يضلك..وشوف اللى ياخد بايدك للحق ..ده ربنا سترك...

كلمة صغيرة لاختى الفاضلة...اختى الكرنفالات اللى بنشوفها دى فى الشوارع وامام الكليات...

مش هى دى اللى حتجيب عرسان...انتى كده بتغضبى ربنا اللى عايز يسترك ويجملك بالحياء..

سبحان الله..تغضبى ربنا وتذلى نفسك للى يسوى واللى ميسواش علشان خاطر عريس ممكن تجيبيه بركعتين فى الثلث الاخيرمن الليل...
مش كده اسهل واطهر ولا بدعوة صادقة واتقاء المولى عز وجل...

وشوفى بقى اللى ربنا حيديهولك..مش اللى انتى عايزة تجيبيه وبرضه بامره..
..ربنا يحفظك ويسترك ويعفك ويحميكى يارب من كل سوء...

_________________

تابع...

اخواتى واحبابى....

دعوة خالصة من قلبى ...علشان كلنا نعمل نيولوك...
ايوة بجد..عايزين نيولوك...

نيولوك فى اخلاقنا...نيولوك فى لبسنا..نيولوك فى تعاملاتنا..نيولوك فى طاعتنا وعبادتنا لربنا سبحانه وتعالى...
نيولوك صح ..من شباب اعزهم الله واكرمهم بدين الاسلام...

اسال الله العظيم ان يكون من عليا بكلمات تساعدنى اولا وتساعد اخواتى على تغيير احوالهم الى الاحسن..

وربنا يارب يحفظكم من كل سوء ويحميكم من انفسكم ومن شياطين الانس والجن يامة خير الخلق..
هذا وما كان من توفيق فهو من عند الله ..وما كان من سهو او تقصير فهو منى ومن الشيطان....

ربنا يحبكم يااشرف واجمد شباب وبنات...

اخوكم عبد الله الفقير..محمد طه....

ده موضوع قريب وحيساعدكم ان شاء الله...
http://dhyatna.yoo7.com/montada-f5/topic-t61.htm

دى كانت الخاطرة العاشرة لحملة حيائى حياتى لسه نازلة النهردة فى الموقع اللى عليه الحملة فقلت اول مكتبتها انزلها واجيبهالكم علطول...يارب تعجبكم..

_________________

[size=24] الله الله جميله جدا وتشد واسلوب رائع ربنا يكرمك يارررررررررررب

والله فعلا حاجه تكسف انا لما بشوفهم دايما سوال يجي فى دماغى دايما اسال هو دا حفيد سيدنا محمد هو ده اللى مسقط بنطلونه من امه سيدنا محمد

والبنات دول كوم تانى لوحدهم هما مش بس بياخدوا ذنوب دول بياخدوا الشباب ذنوب وبيدمروا امه

من هم لله اللى عملوا فينا كده

كتابات حضرتك رائعه وياريت حضرتك تكتب لنا لينك حمله حييائى حياتى
وجزاكم الله خيرا[/size]

نادية كتب:

[size=24] الله الله جميله جدا وتشد واسلوب رائع ربنا يكرمك يارررررررررررب

والله فعلا حاجه تكسف انا لما بشوفهم دايما سوال يجي فى دماغى دايما اسال هو دا حفيد سيدنا محمد هو ده اللى مسقط بنطلونه من امه سيدنا محمد

والبنات دول كوم تانى لوحدهم هما مش بس بياخدوا ذنوب دول بياخدوا الشباب ذنوب وبيدمروا امه

من هم لله اللى عملوا فينا كده

كتابات حضرتك رائعه وياريت حضرتك تكتب لنا لينك حمله حييائى حياتى
وجزاكم الله خيرا[/size]

جزاك الله خير يااخت نادية على مشاركتك القيمة..ربنا يعزك ويبارك فى عمرك يارب...
وللاسف اخواتنا لازم يفوقوا من الغيبوبة اللى عايزينهم يعيشوا فيها..ربنا يهدينا جميعا الى مايحب ويرضى...
ربنا يحبك يارب والحملة كلها على موقع مصطفى حسنى الرسمى..وهى لها اكتر من خاطرة فحيبقى صعب اجيب اللينكات كلها..ممكن حضرتك تدخلى على الموقع وانا ان شاء الله على قد مقدر حجيبلك اللينكات تحت امرك...شكرا على المرور

_________________

ما شاء الله

اللهم ارزقنا جميعا العفاف والطهر واغننا بحلالك عن حرام يالله

بجد موضوع مهم بالذات فى الايام اللى احنا عيشينا واللبس الغريب اللى بيلبسوه الشباب والبنات
اللهم اهدنا جميعا الى الطريق المستقيم واجعلنا من اتباع حبيبك المصطفى صلى الله عليه وسلم

جزاك الله خيرا أ/ محمد ويبارك فى علمك ويهديك ويهدى بك وينفع بك الاسلام والمسلمين

انا مش عارفه اقولك ايه على الموضوع الرائع والهايل والجميل ده
والله نفسى كل الشباب اللى عندنا فى الكلية يقروا الكلام ده
لانى انا لما بشوف شكلهم كده واللى عملينه فى نفسهم بجد بخاف بقول
معقول هما دول اللى حيربوا الاجيال اللى جاية؟؟؟
معقول حيكون من نسل الشاب ده واحد ممكن يعلى كلمة الله وينصر الاسلام؟؟؟
وبفكر لو الرسول كان عايش كنا حنتجرا نلبس ونعمل اللى بنعمله ده؟؟
!! اكيد لاء
وبعدين مفيش بنت ترضى على نفسها انها ترتبط بواحد كل همة الموضة ايه النهاردة
تعرف الدكتور فى الكلية مرة قالنا جملة والله زعلتنى جدااااا
قالنا عيب مصر ان عندها صبيان كثير
لكن الرجالة قليلين
وطبعا الولاد استقبلوا العبارة دى بالضحك وعادى خالص
بس هم لو فكروا فى قصده كويس اكيد مش حيضحكوا

بجد نفسى صلاح الدين وخالد بن الوليد وعقبة بن نافع والناس اللى بيحبوا لربنا دول يرجعوا تانى ويكونوا رجالة يقدروا انهم ينصروا البلاد العربية المحتلة دى

اللهم امين يارب
معلش طولت عليك بس الموضوع عجبنى اوى انى اتكلم فيه
جزاك الله خيرا

ماشاء الله على كلمات حضرتك الرائعه
بارك الله فيك اخى
ووفقك لما يحبه ويرضاه
لازم والله نعمل نيولوك
وانا فى الطريق اليه
ادعووووولى يالثبات

ربنا يفتح عليك ياأستاذ محمد

فعلا الشباب بيبقى شكله مقرف جدا

أنا أسفه فى الكلمه بس ملهاش ترجمه غير كده

حلو أوى النيو لوك وعجبنى جدا وإن شاء الله نحاول نجدد فى حياتنا للأحسن إن شاء الله

ربنا يعزك

الفقيره إلى الله والراجيه عفوه ومحبته ورضاه
نرمين

السلام عليكم ورحمة الله وبركاته

كل سنة وإنتوا طيبين ولو إنها متأخر شوية

بس والله غصب عنى أنا فى بيت عمى وقلت فرصة أدخل أسلم عليكم

عشان وحشتونى ومعرفش النت هايرجع إمتى

أستاذ محمد طه ووالدنا الروحى حمدلله على السلامة وعوداً أحمد

ومبارك عليك وعلينا رجوعك تانى

حضرتك بركتنا وماينفعش تسيبنا

أما بالنسبة لنيولوك

أنا من غير ماأتكلم ربنا يزيدك من رضاه عليك وحبه ليك

لأن بجد كل مرة بتفوقنا وتعرفنا على حاجات ماكناش واخدين بالنا منها

والحمدلله ربنا رزقك بنقطة التأثير فى الناس وإنك تدخل فى القلوب بسرعة الصاروخ وربنا رزقك بنقطة القبول

بمعنى معلش هطول عليكم بمعنى إن حضرتك لما بتكتب موضوع بيبقى طويل

وممكن محدش يقرأه لكن ربنا يعلم لما بنقرأ مواضيع حضرتك بنقرأها كلها وأكتر من مرة

وده معناه إننا حابين نبقى كويسين وحابين ربنا يرضى عننا

ربنا يحافظ عليك ويجعلك دايماً سبب فى هداية الناس

وصدقنى كلنا بنعمل بكلامك ووعد منى إن شاء الله أنا كمان هاعمل نيولوك

لان كلام حضرتك دايما بيفوقنا

آسفة على الإطالة بس أنا ما أعرفش هارجع إمتى تانى لأن النت ربنا يسامحه بيتحكم فينا

مبارك على المنتدى رجوعك ليه ومبارك علينا رجوعك لينا

للأمام دائماً ياأستاذ محمد وربنا عمره مابيضيع أجر حد

ربنا يرضى عنك.....

فى رعاية الله

كلكم هاتوحشونى

[b]بشكر كل اخواتى الافاضل اللى سابوا ردود طبعا...واعذرونى لانى مفتحتش الموضوع لانه قديم شوية..بتاسف لحضراتكم...

جزاكم الله خييير على مجمل ردودكم الطيبة والمبشرة..ربنا يارب يبشركم بالخير والسعادة...

شكرا أ ايمان..أ مريم..أ نيرمين..أ ايمان.....أ نور...
وطبعا شكر تانى لاستاذة نور لانها بعيدة بقالها فترة....ربنا يوفقها يارب وييسرلها كل امر عسير..وباذن الله متغيبش عن منتداها كتير.....

ربنا يكرمكم ويحبكم ويبارك فيكم يارب...
[/b]

_________________

ياااااااه بقالى كتير اوى مش بقرأ الموضايع دى .. الحمد لله ان ربنا هدانى للمواضيع دى تانى .. بجد محتاجالها اكتر من زمان .. جزاك الله كل خير و جعله بميزان حسناتك ..

joliet كتب:

ياااااااه بقالى كتير اوى مش بقرأ الموضايع دى .. الحمد لله ان ربنا هدانى للمواضيع دى تانى .. بجد محتاجالها اكتر من زمان .. جزاك الله كل خير و جعله بميزان حسناتك ..

[b]جزاكم الله خير اختنا الفاضلة وشكرا على الرد الطيب والمرور الكريم...
[/b]

_________________