!!!...فالانتين....!!!

بسم الله والصلاة والسلام على رسول الله

ازيكم ياشباب..يارب تكونوا بخير...

النهردة حنتكلم على اسمى فطرة ربنا خلقها فينا

الفطرة اللى كل واحد حاسس انه عايش من غيرها ان حياته ناقصه ومالهاش طعم ولا قيمة

حنتكلم عن الحب..

ايوة ايوة..حنتكلم عن الحب متتخضش.. وعن يوم الحب وحياة الحب وليالى الحب كل حاجه

ياترى حضرت نفسك لاية...حتحتفل ازاى...جبت هدية؟؟

ياسيدى..
اسمعنى بس للاخر

مش مجنون والله..اصل ياجماعة الحياة من غير حب دى حياة باهتة..حياة ناقصة..ملهاش ملامح

وكمان كل مارتبط حبك ده بحاجة كبيرة...كل مابقت حياتك كبيرة وليها معنى كبير

واكيد الحاجة اللى بتحبها ده حتكون اكبر واغلى شىء فى حياتك

بص طيب
انت مين اغلى حاجة فى حياتك؟؟؟

مين اغلى حد عندك

ياترى مثلا مثلا.. ربنا هو اغلى شىء فى حياتك.... ياترى طاعة ربنا هى اكبر اهتماماتك

ولا فى حد تانى؟؟؟

يعنى فى حد غير اللى خلقك ..وسترك وكبرك

متعرفش..!!؟؟لا متقولش..
فى حد برضه ميعرفش هو بيحب ولا لا...

طيب بص..حسهلهالك..لو عايز تحب ..
شوف مين اللى يستاهل مننا نعيشله كل لحظة وكل ثانية وكل نفس يبقى ليه

اقولك ليه مثلا مثلا يعنى وانا اسف ..انا ضربت مثال بحب ربنا..

اصل ياجماعة حب ربنا ده هو الحب الذى يبقى..حب لايزول...

حب بيزيدك قوة وامان

عمرك ماتخاف ان الحب ده ينتهى بصدمة ولا بدموع

الحب ده معناه العطاء بلا مقابل..

هل ياترى فى حد غير ربنا بيدى بلا مقابل؟؟؟ فى حد بيديك ومش مستنى منك شكر؟؟

فى حد بيخاف عليك ويرزقك ويكرمك بالرغم انك مش بتسمع كلامه

مييين؟؟

مين ده اللى يعمل كده

انا عايزك تسمع الرسول صلى الله عليه وسلم وهو بيقول...ايها الناس احبوا الله من قلوبكم...ايها الناس احبوا الله لما يغدوكم به من النعم

يااااا..على كلمة من قلوبكم دى

يعنى حب نابع من جوة قلبك..حب بيرجف كيانك..حب يخليك مش عارف تعيش ولا حاسس بطعم للدنيا وانت بعيد عن اللى خلقك

حب صادق مليان بقدر وعظمة وجلال الله

حب لنعمه علينا ورافته بينا

حب لستره اللى مغرقنا..حب للرسل اللى بعتهالنا..حب لحمايته لينا

انت ليه مش قادر تخلى كل حياتك وكل حبك لله

ياترى لسه مخلى حد شريك لله فى قلبك ؟؟؟ لسه بتحب فلوس ولا بنى ادم ولا متعلق بدنيا

اسمع الاية اللى ربنا بيقول فيها...ومن الناس من يتخذ من دون الله اندادا يحبهم كحب الله والذين امنوا اشد حبا لله

ولو يرى الذين ظلموا اذ يرون العذاب ان القوة لله جميعا وان الله شديد العذاب

ايوة فى ناس جوة قلبها ناس بتساويها بربنا..لا والعياذ بالله كمان بتفضلها على ربنا

ايوة لما يكون فى ولد ولا بنت مع بعض فى علاقة غلط..هو مش كلمة بتتقال ولا كل وقفة ولا اى حاجة بتحصل ..هو ده مش تحدى لله

احنا مش حنفوق بقى ولا ايه..؟؟

يانااااس اعرفوا قيمة الله

يانااااس اعرفوا قدر وعظمة الله

ياناس اعرفوا الخالق اللى بيدى من غير مقابل

ياناس اعرفوا الستير اللى شايفك وانت بتعصيه ولسه بيكرمك وبيرزقك

اعرف قيمة الخالق سبحانه

تقولها انتى ليه بتحبيه..؟؟تقولك اصله كريم معايا وبيجيبلى اللى انا عايزاه

يابنتى هو فى كريم اكتر من كرم ربنا عليكى

هو فى حد ليه فضل فى اى حاجة فى حياتنا غير ربنا

فى حد فى الدنيا بيستناك ترجعله ويبقى ملهوف على عودتك ليه زى ربنا

احنا فين من حب ربنا ياجماعة؟؟؟

مين الى يستحق منا مين اللى يستاهل ان احنا نتعلق بيه ونسهر الليالى فى حبه

مين اللى يستاهل ان احنا نفضل اللى هو بيحبه على اللى احنا بنحبه

يااااا..احنا ليه مش عايزين نحب ربنا..

احنا ليه زاهدين فى حبنا لله؟؟؟

زاهدييين ليييييه فى حبه؟؟؟

شوف كده الرسول لما يقول ..ان الله اذا احب عبدا نادى جبريل..انى احب فلانا فاحبه...

يااا الله

متخيل ..مقدر الكلام ده

انت لو بتحب حد تقدر تقول؟؟

تقدر؟؟..لا طبعا....

ليه؟؟ علشان غلط...والله حتى لو صح حتكسف تقولها...

شوف ربنا بقى لما يباهى بحبك جبريل

ويقوله انا بحب فلان

ياترى مين معانا دلوقت ربنا بينادى على اسمه؟؟؟

مين اللى ربنا بيحبه وفرحان بعودته؟؟

ممكن تكون انت

ممكن تكون انتى

ايوة والله ..اقسم بالله مش بقول اى كلام

لو حاسس بمدى صدقك دلوقت حيحبك

لو حاسس بتوبتك دلوقت حيحبك

توب يااخى وانت بتقرا الكلمات دى واكسب حب الله

انت مش حااسس بكلمة عبد دى....انت مش مقدر عظمة كلمة عبد لله دى

ده كلمة عبد دى قمة حب الله ليك

شوف ربنا لما بيقول اذا سالك عباااااادى.....

يا على الامان والحب اللى بيملا قلوبنا لما تسمع عبادى دى

ده الله لما اتكلم على سيدنا محمد عبده وحبيبه فى بداية سورة الاسراء..قال..سبحان الذى اسرى بعبده ليلا

عبده..رغم انه طالع فى اقصى حتة ممكن يوصلها بشر او ملاك

مقالش رسول الله محمد ..لا قالى عبدى...لان هو ده قمة الحب والتشريف...

انت كمان ربنا بيحبك وبيشرفك بكلمة عبدى

شوف الفاتحة فى الصلاة..لما تقول الحمد لله رب العالمين

ربنا بيرد عليك..كانه بيتباهى بيك..ويقول حمدنى عبدى

يااااااا ع اللى احنا فيه..

فوق بقى يابنى..فوقى يابنتى هو ربنا مستنيك

ايييه ده كله يااارب؟؟؟

ايه الحب ده كله والله مانستاهل ده.......؟

ليه ربنا خلالنا كل حاجة بنعملها فى حبه ترفعنا درجات رغم انها قليلة

تخيل لما يقولك صيام يوم عرفة يكفر سنة ماضية وسنة اتية

ولا الصلوات الخمس اللى انت بتصلى وانت زهقان وتادية واجب..تكف اللى بينها..يعنى غيبة ولا كدب ولا اى ذنب من اللى بتعمله.

ليه بيقولك ان كلمة..كلمة..اه والله كلمة..تملا الميزان

الحمد لله... تملا الميزان!!!

ليه بيقول ان لو قمت انت ومراتك بالليل تصلوا يبقى رحمكم ودخلتوا تحت رحمته

ليه لو قلت رضيت بالله ربا وبالاسلام دينا وبمحمد صلى الله عليه وسلم نبيا ورسول..كان حق على الله ان يرضيك

ليه جابلنا ليلة واحدة لو قمناها لله ..كاننا عبدناه 84 سنة

ليه الحسنة بعشرة الى سبعمائة ضعف ويضاعف الله لمن يشاء والسيئة بمثلها فقط وتتمحى كمان

..ليه كل ده يارب ولمين ده كله ياحبيبى

للى ضيعوا دينك

للى بقوا صورة وحشة لرسولك

للى واقفة طول النهار تحب فى الكلية ولما تروح فى التليفون

للشاب اللى ماشى مش قادر يشيل سماعة الاغانى من ودنه

لمين ده كله..؟؟

سيدنا على كان يقول..لو قالوا لى سنجعل حسابك لابيك وامك لرفضت وقلت لله..لان الله ارحم من ابى وامى

ياجماعة عايزينها رسالة حب..عايزينها اعيااااد حب

عايزين كل ثانية فى حياتنا تبقى عيد حب لله

كل سجدة وكل لحظة قرب تملا قلوبنا وكياننا بحب ربنا

يابنتى.. يااختى الفاضلة..مين اللى يستاهل حبك؟؟؟

مين اللى يستاهل قلبك الطاهر ده؟؟؟

قلبك الطاهر اللى عايزين يفسدوه..مين غير ربنا اللى سترك ومش مخلى نفسك فى حاجة

مين غيره الرحيم..الودود الرءوف

اللى بيفضلك على كل خلقه بانه جعلك بنى ادم

وفضلك على كل البنى ادمين انه جعل لينا رسول

وفضلنا على كل الامم اللى ليها رسل بانه اصطفانا اننا نكون من امة الحبيب محمد

عايز ايه تااانى؟؟

شوف حب الله ليك دلوقت بانه اختارك تسمع كلمتين عنه

فضلك عن غيرك اللى الدنيا لاهياهم بالمعاصى والذنوب..وقريت الكلمتين دول

شوف قاعد ازاى ومرتاح وربنا كارمك باسرة وامان رغم ان غيرك مش عارف يلاقى حتة ينام فيها

لازم نرجع ياجماااعة..

لازم نرجع يااخواتى

لازم نعرف مين اللى يستحق الحب

كسبتى ايه يا بنتى من الحرية والتشبه بالغرب

عايزة تحتفلى بالفلانتين

مبروك عليكى الحرية ياستى

مبروك عليكى الحرية اللى خلت عندنا ملاييين لسه متجوزوش لحد دلوقت

مبروك عليكى الحرية اللى خسرتك حب ربنا

مبروك عليكى الحرية اللى اديتك جوز مش مقدر قيمتك ورايح جى يبص ع الاصغر واحلى منك

مبروك عليكى الحرية اللى حتخلى ولادك اول ماتكبرى يرموكى فى دار مسنين

هى دى الحرية

هو ده الحب اللى كدبوا عليكى بيه

الفلانتين ده اللى جى من الغرب ..واللى بيضحكوا على عقولنا بيه وبيغشوكى ويقولولك ان برة حياة الحب والحرية

عايزك تعرفى ان فى امريكا..كل 18 ثانية فى حادثة واحد بيضرب مراته

عايزك تعرفى ان كل 7 ساعات فى جريمة اغتصاب بتحصل

ايه رايك فى الحب بتاعهم بقى؟؟؟

اعرفى ربنا وحب ربنا..حتعرفى تحبى كل حاجة

حتعرفى ان كل كلمة حب حتبقى حسنة....كل ضحكة فى وش مراتك حتبقى حسنة..كل خروجة حسنة..كل هدية حتبقى حسنة

فى اكتر من كده

احنا ليه مصرين نبقى خاينين

خاينين؟؟؟

اه خاينين

هو انتى ولا انت لما تضيعوا المشاعر الجميلة الطاهرة دى فى حب حرام..مش حتبقى خنت مراتك ولا خونتى جوزك اللى جى بعد كده

ايوة عشان مشاعرك دى ملك جوزك

قال صلى الله عليه وسلم...يرفع لكل غادر يوم القيامة لواء...يقال هذه غدرة فلان

يانهار ابيييض..حنتفضح ياجماعة..حنتفضح والله

حيجى جوزك اللى خنتيه..حيجى ابوكى واخوكى اللى ختنتيهم..حيجى عيلتك

ياستيييير ارحمنا يارب...

لازم نصحى...لازم نعرف مين اللى يستحق الحب

يابنتى ياللى فى ثانوى...اختى اللى فى الكلية اللى مستنية فارس الاحلام...اختى اللى فى سنة اولى جواز

اختى ست البيت اللى فاتحة بيتها فى حب وتفانى

ربنا وحده اقدر بالحب

ربنا اللى بيدى يبقى لازم هو اللى ياخد

انت دلوقت عليك الاختيار

ياما حب الله وكل اللى شرعه ليك..ياما حب الفلانتين والحب الحرام

الحب اللى حيملا حياتك حسنات سواء مع جوزك مع اهلك..او الحب اللى حيجيبلك كوااارث

وانا هنا مش حتكلم على حب شخص بس زى ماقللت..لا بتكلم عن اى حب او تعلق بحاجة غير ربنا

يالا بينا بقى يااخواتى..

يالا نخلى حياتنا كلها لله

كل كلمة وكل شوق وكل حب يبقى لله وفى حب الله

عايزك وانت ماشى تناجى ربنا

وانت قاعد تسبح ربنا

وانتى بتطبخى لعيالك تبقى لله

وانت بتشتغل تبقى لله

كل حاجة لله..حياتنا وشغلنا ولبسنا وعيالنا وجوازنا..كله ليك يارب

الدنيا كلها حتجيب هدايا الايام الجاية

واحنا برضه لازم نقدم هدية للى بنحبه

صح ولا ايه؟؟

اوعى تحرم نفسك من المعانى الحلوة للحب

هديتنا حتكون لربنا

فكر بقى فى الهدية دى

اقولك انا عندى واحدة

ايه رايك تكون هديتنا لله..اننا نحاول على اى حد من اصحابنا كان ناوى يحتفل باليوم ده..ميحتفلش بيه

بااااى طريقة..اتنازل يااخى عن كرامتك عشان خاطر ربنا

يالا بقى وروا ربنا الشغل والهدايا

اول حاجة حاجة فيك انت حتصلحها عشان خاطر ربنا

اى ذنب بتعمله

سيبه وقول ده لله..جاهد نفسك..اكسب اجرين

وتانى حاجة حنغير الكون اللى حوالينا

ورب العزة لنغيره

لازم نقدم هدية لله

هدية لحبيبنا

حنوقف حال الشباب الحبيبة بتوع الفلانتين على قد منقدر..

يالا يااخواتى..اخواتنا اللى مش عارفين الصح ايه مستنيينا

اعمار الارض مستنينا

الدعوة مستنيانا

حب الله اللى لازم يدخل قلب كل حد غافل مستنينا

اوعوا نتاخر عن نداء الله

ربنا يتقبل منا جميعا

انا عايز بقى الحب العملى

اللى مزعل ابوه ولا امه دلوقتى يقوم يجرى عليهم ويصالحهم ويبوس ايديهم...كله لحب الله

عايزك تطيعى جوزك وتقومى تصالحيه دلوقت وكله لله

عايز حب ربنا يبقى باين على وشك من ابتسامتك ومظهرك وتعاملك مع الناس

والله ياجماعة الدين ده زى ماهو دين شرف وعزة وقوة

فهو كمان دين القلوب

دين حب ورومانسية

كل حاجة حتلاقيها فى الدين ده

بحبك يارب

شوف الرسول لما سالوه مين احب الناس اليك

قال عائشة

وسط الناس من غير كسوف

سيدنا ابراهيم قعد 80 سنة مع السيدة سارة وهى مش بتنجب عشان بيحبها وخايف عليها..ومتجوزش عليها الا لما هى اصرت

فى حب اكتر من كده..؟؟؟

يالا ياشباب نشتغل....على الاقل انشر الموضوع لو عجبك ..لو مش حتقدر تعمل الا كده اعمل...

ياااارب يكون ربنا من عليا بكلمات تقدر توصلكم

ويارب يكون فتح عليا

انا اسف للاطالة

بس بجد بجد كل ثانية انا عايزها تكون لله وفى حب الله ونخلى الدنيا كلها تسبح بحمد وحب الله

ربنا يتقبل منا جميعا ويفتح علينا امين

انا عايزكم تعملوا اللى اتفقنا عليه ....ده وعد ها..

حنقضى على اسطورة الفلانتين الفاسدة على الاقل فى الاماكن اللى
عايشين فيها....

ربنا معانا وهو المستعان...

جزاكم الله خيرا وربنا يهدينا جميعا الى مايحب ويرضى...

اخوكم الفقير لعفوربه..محمدطه..

والله ماشاء الله استاذ محمد ....الكلام جامد ومعبر جدا كما عوتنا دائما

وان شاء الله نعمل بالنصيحة ونجاهد انفسنا ونقوى بعض على طاعة الله

جزاك ربى الفردوس الاعلى

ختامه مسك كتب:: والله ماشاء الله استاذ محمد ....الكلام جامد ومعبر جدا كما عوتنا دائما

وان شاء الله نعمل بالنصيحة ونجاهد انفسنا ونقوى بعض على طاعة الله

جزاك ربى الفردوس الاعلى

جزاكم الله خير على المرور الكريم والرد الطيب..شكرا لحضرتك..
.

جزاكم الله خيرا علي الموضوع الاكثر من رائع
وبجد ربنا يكرمك لانك دايما بتفكرنا وتنبهنا للاخطااااء اللي ممكن نقع فيها
بجد حب ربنا ده اغلي حاجة في الدنبا هو اللي يخلي للدنيا طعم حلو مش حب اي انسااااان احبب من شئت فانك مفارقه
لكن حب ربنا مش حيفارقنا لو فضلنا منفذين لاوامره وتحت طاعته دايما
اللهم ارزقنا حبك يارب العالمين

جزاك الله خيرا
يعنى ممكن اشارك بحكاية صغيرة
كانت فى اخت فاضلة بتحب زوجها جدااااااااا وبتحاول ترضية بكل طاقتها وهو برضوا مش بيرضى
حتى انها بقت تفكر ازاى ترضيه حتى وهى فى الصلاة
بتسرح فى رضاه ازاى
وبرضوا مش بيرضى عنها
وبعدين راحت لقريبها شيخ فاضل
وحكتله على حالها
قالها ولا عمرة ماهيرضى عنك
قالها صلحى علاقتك وحبك لربنا
وهو يصلحلك علقتك مع زوجك
سبحان الله مع انة زوجها يعنى مش ولد ماشية معاه المهم
الاخت دى بقت تخلى كل طاقتها انها ترضى ربنا
ومش بقت تفكر فيه فى الصلاة
تصوروا ان انقلب الحال
بقى زوجها بيتمنى رضاها
سبحان الله لما ربنا يحبك هيحبب فيك وفيكى كل شىء
اللهم ارزقنا حبك وحب من يحبك وحب كل عمل يقربنا الى حبك
!!!...فالانتين....!!! C4d2e6c4ea9c781b8ade14ad9243a5e5_lm

جزاكم الله خير اخت جنى الجنتين..على الرد القيم والمرور الكريم..والاخت فتاة الاسلام على ردها الطيب والقصة الرائعة دى...

بارك الله فيكم وتقبل الله منكم وعلمنا واياكم...

بارك الله فيك استاذ محمد ربنا يعزك يارب
بجد فعلا لازم كل يوم يعدى علينا وربنا كتبلنا عمر جديد نقدم هدية لحبيبنا كلنا الله عزوجل لأنه يستاهل الحب ويستاهل هدايا كتير اوى وده فعلا الحب الحقيقى اللى فى الدنيا دى كلها حب فيه غذاء للروح والقلب والنفس
والله اللى مدقش حلاوة حب الله عزوجل وماوصلش قلبه يبقه انسان ميت
لما الواحد بيحب اى انسان مجرد مايبعد عنه يااااه على الشعور اللى بيحسه تحسه انه متشوق ليه ووحشه جدا فمابالك بقه بربنا سبحانه وتعالى لما تحبه
لما تسمع نداء الصلاة تقوم قايم بسرعه عشان متشوق انك تقابله وهتشوف ايه الحاجات اللى بتقربك منه وتعملها وايه الحاجات اللى بتبعدك عنه وانته كمان هتبعد عنها
بحبك ياربى
ربنا يرزقنا جميعا حبه اللهم امين
وان شاء الله تكون حياتنا كلها مليانة حب لله ومع الله
وان شاء الله نعمل بالنصيحة
ربنا يكرمك ويحبك

جزاك الله عنا خيرا استاذ محمد على التذكرة
وربنا يهدى بنات وشباب المسلمين الى مايحب ويرضى
بجد خسارة اسمى وانقى فطرة احنا اتخلقنا بيها نلوثها بعلاقة حرام او نلوثها ببعدنا عن الله تبارك وتعالى
انا لما بشوف حد بيستنى يوم الفلانتين ده ويعمله احتفال خاص والحوارات دى
بقول الحمد لله الذى عفانى مما ابتلى به غيره
لانى بعتبر اللهو اللى هما فيه ده ابتلاء
بس ندعيلهم ربنا يهديهم ويردهم الى الدين ردا جميلا
احنا ديينا جاء وهو متابع وليس تابع
وباذن الله تكون هدايانا يومية لله تبارك وتعالى وتكون على هيئة اعمال خير او تسبيح او قراءة جزء حنعمل اى حاجة ترفع من قدرنا عند ربنا
وعلينا اننا نخلص نيتنا لله
وربنا باذن الله يتقبل منا خالص الاعمال
وجزاك الله عنا خير الجزاء
موضوع جميل وكلام طيب ربنا يعلمنا

الله اكبر عليك استاذ محمد
جزاك الله خير الجزاء
والله لا يستحيق الحب الا الله
يارب اهدى شباب وبنات المسلمين
بحبك اوووى يارب