تحبوا تعرفوا سر ثباتي بعد سماعي خبر وفاة والدي؟؟

السلام عليكم ورحمة الله وبركاته
توفي والدي الحبيب رحمه الله منذ يومين
كلنا عارفين إن الموت ده مصيبة وابتلاء كبير من رب العالمين
قال الله تعالى في كتابه العزيز(ولنبلونكم بشئ من الخوف والجوع ونقص من
الأموال والأنفس والثمرات وبشر الصابرين، الذين إذا أصابتهم مصيبة قالوا
إنا لله وإنا إليه راجعون أولئك عليهم صلوات من ربهم ورحمة وأولئك هم
المهتدون) صدق الله العظيم
اللهم اجعلني وأهلي من الصابرين المبشرين
(إنا لله وإنا اليه راجعون)ياترى دي كلمة من السهل ان الواحد يفتكرها لحظة المصيبة؟؟
فكروا كويس كدة وحطوا نفسكم مكاني أو مكان أي حد ربنا بيبتليه بفراق أغلى الناس..
أنا هرد عن نفسي قبل وفاة والدي، كنت لما بسمع خبر وفاة حد غالي عليا كان
لساني بيتلجم ومش بنطق بولا كلمة ومش بفتكر أبدا إني أنطق بإنا لله وإنا
اليه راجعون، ممكن أكون بفتكرها بعدين، لكن فين الصبر عند الوهلة الاولى
اللي حبيبنا المصطفى قال عليه؟؟ صبري لازم يبان عند صدمتي، لكن زي
مابقولكم الموضوع ده فعلا مش سهل ومش بشطارتنا ولكن هو تأهيل من رب
العالمين وأنا هقلكم ازاي ربنا أهلني لسماع خبر وفاة والدي الحبيب رحمه
الله وأسكنه فسيح جناته، وهقلكم سر ثباتي اللي كتير من اللي كلموني كانوا
متعجبين منه.
والدي رحمه الله دخل المستشفى قبل الوفاة بحوالي 12 ساعة وفي خلال 9 ساعات
من دخوله المستشفى بدأت الحالة في الاستقرار واطمئنت قلوبنا لقرب الشفاء
ان شاء الله تعالى. وكلها ساعات معدودة ووالدي هيرجع وينور البيت، يعني
بمعنى أصح محدش كان متخيل إن الساعات المعدودة في انتظار قدومه للبيت
هتكون هي الساعات الاخيرة في حياته، طبعا في الحالة دي الصدمة هتكون صعبة
جدااااااا لأن الموضوع بعيد جدااااااااا عن تخيلنا ومن هنا جات رحمة ربنا
بيا وتأهيله ليا للابتلاء الكبير ده.
قبل سماع خبر الوفاة بنصف ساعة جاني الهام من رب العالمين وكأن صوت
بيكلمني في وداني وبيقلي تذكري كلام الحبيب المصطفى لما ابنه ابراهيم
توفاه الله(إن العين لتدمع وإن القلب ليحزن ولا نقول الا مايرضي ربنا وإنا
لفراقك يا ابراهيم لمحزنون)
ما انكرش اني اتهزيت في اللحظة دي ولقيت الجملة بتتكرر على مسامعي للمرة
التانية ولقيت إن جملة وإنا لفراقك يا ابراهيم لمحزنون بتتبدل وتبقى وإنا
لفراقك يا والدي لمحزنون، اتهزيت أكتر وسألت نفسي ليه ربنا بيذكرني
بالكلام ده في الوقت ده؟؟
أيقنت لحظتها إني بعد قليل هسمع خبر وفاة والدي وربنا أهلني بكدة بالهام
منه لأمة فقيرة ليه، حسيت ان ربنا بيقلي أنا هبتليكي ابتلاء كبير بس عايزك
تكوني أده ومش عايزك تنطقي بكلمة واحدة تغضبني،حسيت إن ربنا بيشرفني في
أصعب ابتلاء بيمر عليا في حياتي وبيخليني أقتدي بسيد الخلق أجمعين، حسيت
إن حبي لربنا وايماني بيه لازم يترجم ترجمة عملية مش مجرد كلام عن رضانا
عن قضاء الله في أوقات الرخاء وعند وقوع المصيبة بننسى كل عهودنا مع ربنا
وكأن لسان حالنا بيقول أنا مش هقدر أعبدك دلوقتي لأن عندي مصيبة، كل ده
دار في عقلي خلال النصف ساعة الاخيرة في حياة والدي وكنت على يقين بسماع
خبر الوفاة بعد قليل جداااااااا، رن جرس التليفون وكنت على يقين إن هو ده
التليفون اللي هسمع فيه الخبر المحزن جداااااااااا لقلبي والله وحده هو
الاعلم بمدى الحزن اللي في قلبي، سمعت الخبر وافتكرت الهام ربنا ليا
ورسالته ليا وإن الحال اللي هيرضيه عني دلوقتي هو نطقي بما يرضيه، ظللت
أردد إنا لله وإنا إليه راجعون، ولقنتها لأمي ولكل اللي كانوا حواليا،
وحضنت أمي وقلتلها ده قضاء ربنا ولازم نرضى ونقول الحمد لله.
بفضل ربنا وتأهيله ليا كنت ثابتة جدا وكلمت الناس وبلغتهم بخبر الوفاة
وطلبت من أصدقائي الدعاء لان هو ده اللي هينفع والدي في قبره، بفضل الله
كنت أثبت من ناس كتير كانت حزينة على والدي لكن مهما اتقدر حزنهم مش هيكون
حاجة مقارنة بحزني عليه لانه ببساطة أبويا اللي كل تفاصيل حياتي مرتبطة
بيه.
حاولت أنفذ الرسالة اللي ربنا أرسلهالي قبل الوفاة على الوجه الذي يرضيه،
بكيت عالفراق وقلبي كان في قمة حزنه وهيفضل حزين إلى أن يأتي اللقاء في
الجنة إن شاء الله
لكن كان كل حرصي إني ما أنطقش كلمة واحدة تغضب حبيبي الله، وأرجو الله إني
أكون نجحت في إني أرضيه، وأنا ظني بالله إنه رضي عن حالي لأنه كافئني لما
ربط على قلبي وثبتني وصبرني صبر أضعاف ماكنت أتخيله، أنا كتير فكرت في وقت
فراق حد عزيز وغالي عليا من أهلي وكنت حاسة إني أكيد لو حصل حاجة زي كدة
هنهار، لكن سبحان الله اللي حصل كان العكس تماما وكنت بفضل الله وحده قمة
في الثبات وماكانش على لساني غير الحمد لله وانا لله وانا اليه راجعون
وقراءة القرآن والدعاء له، وافتكرت دعوة كنت بدعيها كتير اقتداء بالنبي
عليه الصلاة والسلام وحسيت ان ربنا بيستجيب ليا دعاء دعيته
كتييييييييييييييير، الدعاء هو اللهم ارزقنا الرضا بعد القضاء، والحمد لله
ربنا استجاب لدعائي في أصعب وأشد قضاء على النفس وهو قضاء موت الاحبة،
فعلا ياجماعة الرضا قبل القضاء حاجة والرضا بعد القضاء حاجة تانية خالص،
لان ممكن لما تسأل أي حد لو حصلك المصيبة الفلانية هتصبر وترضى ولا لا؟؟
الاجابة في وقت الرخاء بتكون سهلة جداااااااااا(طبعا هرضى)لكن الرضا
الحقيقي مش بيبان في القلب الا بعد القضاء..
بالرغم من عظم البلاء لكن مش هقدر أوفي شكر ربنا في كل الرحمات اللي جوة
الابتلاء واللي بحمد ربنا ان قلبي شايف الرحمات دي عشان تهون عليا، الحمد
لله ان موت والدي كان رسالة رحمة من ربنا، الحمد لله على الايمان اللي
حاساه مالي قلبي واللي حاساه زاد بعد الابتلاء ده، الحمد لله لان قضاء
ربنا كله خير.
اللهم ارزقنا الرضا دائما وابدا
آسفة لو كنت طولت عليكم وآسفة لو أفكاري مش مترتبة بس أتمنى أكون وصلت اللي في قلبي لقلوبكم.
والسلام عليكم ورحمة الله وبركاته

البقاء لله ربنايرحمه ويسكنه فسيح جناته
ربنايثبتك ويصبرك ويخلفك خيرا
دمعت عيناى من كلامك حبيبتى ربنا يبارك فيكى ويرضيكى بمايرضيه

انا لله وانا اليه راجعون

البقاء لله وحده

اللهم ارحم والد اختى اسمه وغفر له واعفو عنه

اللهم اجعل مثواه الفردوس الاعلى واجعله رفيق النبى فى الجنة

اللهم اجعل قبره روضه من رياض الجنه

اللهم نقه من الذنوب والخطايا كما ينقى الثوب الابيض من الدنس

اللهم جازيه بالحسنات احسانا وبالسيئات عفوا وغفرا

ربنا يصبرك حبيبتى اسماء ويقوى ايمانك ويرزقك الرضاء بقضاءه

ما شاء الله عليكى وعلى صبرك والقوى اللى ربنا ادهالك انك تصصبرى على ابتلاء شديد وقوى زى ده

ربنا يثبتك ويسعدك ويرضى عنك ويكرمك يااااااارب

بحبك فى الله

حبيبتى اسماء البقاء لله
انا لله وانا اليه راجعون
ربنا يرحم والدك ويجعل مثواه الفردوس الاعلى ويجعل قبره روضة من رياض الجنة يارب
ربنا يثبتك يا اسماء وينطق على لسانك كل مايحبه ربى ويرضيه
ربنا يرضى عنك ويكرمك ويصبرك ويثبتك يارب
ربنا يباركلك

البقاء لله يياستاذة اسماء....انا لله وانا اليه راجعون...
ربنا يصبر قلبك ويغسله بماء اليقين ويحرسه بعين الرضا....ويلهم اهلك الصبر والسلوان والاحتساب...

ويرزق والدك منازل الشهداء والصالحين والصديقين..ويبدله عن كل اساءة احسان ويجعل كل عمل صالح له مضاعف مبارك فيه..ويجعلكم ذرية صالحة تدعون له وتتصدقون وتعلم الناس بما ساعدكم فى تعلمه....
البقاء لله...وكلنا هنا اخوات حضرتك....
متاسف جدا على التاخير...

سبحان من له الدوام والبقاء
ربنا يعزكم ويكرمكم جميعا
وجزاكم الله خيرا على دعائكم لوالدي رحمه الله

رحمه الله رحمة واسعة وثبته وبشره برضاه ومقعده من الجنة اميييين يارب ...
سبحان الله نفس ما حدث مع جدى ربنا يرحمهم جميعا يارب..

زادك ربى ايمانا وتسليما وسكينة ورضا انت والاهل جميعا يارب
البقاء لله حبيبتى

إنا لله وإنا إليه لراجعون
البقاء لله حبيبتى أسماء
ربنا يصبرك ويصبر أهلك ويرزقكم الثبات
موقف صعب والثبات فيه أصعب
ربنا يرحم والدك رحمة واسعة
بحبك فى الله

البقاء لله اختى اسماء
إنا لله وإنا اليه راجعون
ربنا يصبرك يارب
رحم الله والدك واسكنه فسيج جناته
اللهم نقه من الذنوب كما ينقى الثوب الابيض من الدنس
ربنا يحفظك حبيبتى ويكرمك