عاوزه اتجوز ... هدف ام حلم ؟ ... وهل يصلح هدف للحياه؟

موضوعى ده انا اقتبست فكرته من اخت ليا على منتدى مصطفى حسنى ..وهو اهداء لكل اخواتى هنا على المنتدى..

هل الزواج اصبح ..هدف ام حلم ؟

كتير من البنات بقو عايشين لهدف اسمه الزواج .. للاسف الزواج مبقاش حلم كل بنت ..ده اصبح هدف للحياه كلها..

لما يكون هدفى من الدنيا انى اتجوز واكون عايشه لحلم الزواج وبس .. ياترى ده ينفع يكون هدفى من وجودى فى الحياه؟
مسألتيش نفسك بعد ما الهدف او الحلم ده يتحقق وتتزوجى هتكونى عايشه لايه بعد كده ؟

انا هجاوب..

لتربيه الاولاد ومذاكرتهم واكلهم ولبسهم ..الخ
ده كله مش حرام طبعا ..

بس ده مش هدفنا فى الحياه اننا نتجوز وناكل ونشرب ونخلف ونموت ... مش ده هدف الاسلام من المرأه .. احلمى بالزواج والبيت والاولاد زى مانتى عاوزة .. بس الهدف من حياتك لازم يكون اعلى من كده ..

مش ده هدف ربنا مننا لما خلقنا .. قال تعالى: " واذ قال ربك للملائكة انى جاعل فى الارض خليفه"
وايضا..قال تعالى: " وما خلقت الجن والانس الا ليعبدون"

ها حد قدر يحدد الهدف...

احنااتخلقنا ليه ؟

1- خليفه= اصلاح+ اعمار الارض بأوامر ونواهى الحق تعالى ..ليه؟
عشان دى كانت رساله النبى فكانت امته خير امه اخرجت للناس .." كنتم خير امه اخرجت للناس تأمرون بالمعروف وتنهون عن المنكر"

اذا رقم واحد انى اصلح من نفسى + اصلاح غيرى

2-عبادة الله= احول العادات لعبادات ..يعنى زواجى واولادى وطاعة ابى وامى حتى تواجدى هنا على المنتدى لعباده لله عزوجل.. ازاى؟
انه يكون هدفى من حياتى كلها ."ارضيك يارب.. " وعجلت اليك ربى لترضى"
قال تعالى " قل ان صلاتى و نسكى ومحياي ومماتى لله رب العالمين "

اذا رقم 2 احول حياتى كلها عباده لله عزوجل لا ابتغى منها الا ارضاءه عزوجل..

ها عرفتى احنا هدفنا ايه ؟ عرفتى احنا رجال ونساء ااتخلقنا ليه؟

احنا كلنا عايشين فى مجتمع حقق ومازال بيحقق هدف الزواج كل يوم .. بس ياترى مجتمعنا اتقدم ..
اعداد امتنا بتزيد ولسه زى مااحنا ..
عارفين لو حولنا حلم الزواج ده لهدف اسمه .. ارضيك يارب.. فيكون هدفى من الزواج انى اكون اسره مسلمة صح واربى ولادى على طاعة الله ورسوله اخرج منهم الدعاه والعلماء والقاده ..الخ
ساعتها امتنا هتتقدم والاسلام هينتصر ..
مالنبى عليه الصلاة والسلام تزوج اكثر من مره وللرجل فى دينا انه يتزوج اربعه فى وقت واحد..
بس احنا خدنا قشور المسأله دى ومبصيناش على المضمون..
يعنى ربنا لما شرع للرجل الزواج من اربعه ..كان الهدف اكترو يامسلمين وخرجو اجيال تشيل راية الاسلام.. بس للاسف اه كترنا عدينا المليار كمان .. بس بقينا كغثاء السيل ..
عرفتو دلوقتى احنا المفروض نتجوز ليه؟

طب احقق الهدف ده ازاى؟
ابدأى باصلاح نفسك واللى تتعلميه من دينك بلغيه لغيرك كما علمنا الحبيب صلى الله عليه وسلم " بلغوا عنى ولو ايه" ..هتكونى كده من حملة رسالة الاصلاح وتكونى بجد خليفه لله فى ارضه على خطى نبيه صلى الله عليه وسلم..
وبعدين ابدأى عدلى نيتك فى كل حاجه بتعمليها كل حاجه ... الى.. ارضيك يارب..

ياااااااااااااااااه .. ساعتها والله هتحسى انك طايرة فى السما وانك ملكتى الدنيا فى ايديكى ..
وهتحسى بسعاده كبيره قوى لا يملكها احد الا الله عزوجل .. وماعند الله لا ينال الا برضاه ..
انا مش ضد الزواج لا طبعا ازاى احرم مااحله الله .. بس انا عاوزه هدفنا من الزواج يكون كما اراد الله ونبيه .. نصرة هذا الدين ..

والله لو عيشتى لربنا زى ما اراد ليكى وبقه محور حياتك ارضاء الله واصلاح الارض..
والله وعن تجربه هتعيشى احلى حياه وهو تعالى هيرزقك من فضله الزوج اللى بتتمنيه ..

يلا يابنات نشتغل ونعلى الهمه لربنا .. ونوحد هدفنا .. وعجلت اليك ربى لترضى..

اسفه للاطاله وفى انتظار مشاركاتكم..

السلام عليكم حبيبتى رحيق
أولاً جزاك الله خيراً على موضوعك الجميل
وفعلاً كلامك صح معظم البنات بقى همهم الجواز وخلاص
وفعلاً ده هدف بنات كتيييييييييير أعرفهم
وكلامك كله حلو وجميل جداً عن النظرة الحقيقة للزواج
وياريت كلنا نحط فى دماغنا المفهوم الجميل ده
إن من الزواج أقدر أرضى ربنا وأقدر أعيش أحلى حياة
مش معنى إن البنت تتجوز يبقى مفيش فى دماغها
غير العيال والطبيخ والكلام ده
بالعكس ده ممكن إنتى تدخلى زوجك الجنة
والعكس كمان إن زوجك ممكن يدخلك الجنة
بس لو كان هدفكم واحد
إرضاء الله
ربنا يكرمك ويعزك يارب
وآسفة على الإطالة

جميل جدا موضوعك وطرحك حبيبتي رحيق بوركتي
وطبعا ده الواقع واحنا اللي في الواقع واللي مخلينو كده
وطبعا احنا ما تخلقناش عشان ناكل ونشرب ونتجوز وبس اعنا اتخلقنا عشان حاجات اكبر واعظم
عايزة اقول ان لو كان الهدف من الحياة الزواج مش حنعرف نحقق الهدف ؟حتعرفي ازاي تنشئي جيل بعدك وانت اصلا
ما اصلحتيش نفسك ونظرك محدود جد
جزاكي ربي الجنة حبيبتي

جزاكى الله خيرا حببتى نور وامينه ..
ايوه كده طمنتونى على مستقبل الامه ..
ايوة كده بنات محمد صلى الله عله وسلم بخير .. تبقه الامه ان شاء الله بخير .. يبقه النصر قريب
والله انا عملت الموضوع ده ووجهته بالذات للبنات عشان نهضة الامه دى لن تتم الا على ايدى بناات زيكو يشيلو حلم النهضه ويعيشوا ليه ويخرجولنا رجاله ترفع راية الاسلام ..
اوعو مهما حصل تتنازلو عن هدفكو يابنات مهما اتقال دى عنست ولا زى مابيتقالى عمرك ما هتدخى اللى انتى عاوزاه... قوليلهم ملكوش دعوه انا بطلب من رب لا يعجزه شئ فى الارض ولا فى السماء ..

ياااااااااااااارب ترزق كل بنات المسلمين العفه فى كل مكان والازواج الصالحه وتخرج من ارحامهن من ينصر هذا الدين ..امين

جزاكم الله خيرا

السلام عليكم مش جديد عليكى بجد يااسماء
موضيعك دايما جميله ربنا يارب يبارك فيكى يارب
وبجد كلامك جميل اوى ربنا يكرمك يارب

جزاكى الله خيرا يا فاطمه ويانور الدنيا ..شرفتو الموضوع بمشاركتكم ..
ربى يرزقكم جميعا الازواج الصالحه وتطلعولنا صلاح الدين لهذه الامه امين...

بارك الله فيكى
بس بجد امنية حياتى انجب طفلا ويكون إسمه حمزة ويكون نفس صفات أسد الله

نرمين الطحاوى كتب:

بارك الله فيكى
بس بجد امنية حياتى انجب طفلا ويكون إسمه حمزة ويكون نفس صفات أسد الله

جزاكى الله خيرا يا نرمين على المشاركه ..
كده برده تاخدى اسم ابنى ؟ههه
انا كمان نفسى ربنا يكرمنى بولد يكون زى اسد الاسلام سيدنا حمزة رضى الله عنه وكمان بنوته اسمها رحيق ..ويكونو ثمرة ليا فى الدنيا اخد ثوابها وثواب اولادهم ..الخ الى قيام الساعة..
ربنا يستجب ويرزقنا جميعا الاخلاص..
جزاكى ربى الفردوس الاعلى..