شكل التوصيات وطريقة العمل...

بسم الله والصلاة والسلام على رسول الله...

السلام عليكم ورحمة الله وبركاته..

دى كان شكل التوصيات اللى نزلناها..عايز اعرف رايكم فيها..علشان نمشى عليها ان شاء الله..

.احنا حنزل شكل التوصيات حيبقى عامل ازاى ..وحتبقى ايه طريقة شغلنا وعملنا الاسبوعى...وان شاء الله نبتدى فيه من اول الاسبوع تكونوا اتصلتم بمشرفين المجموعات وقولتلهم ..عشان نبقى كلنا مع بعض...ونحدد ايه هى الحاجات بالضبط..

زى ماتفقنا من الاول على حملتنا قايمة على حاجتين ان احنا نصلح نفسنا....وبعدين نبتدى ناخد بايد الناس معانا...

وده كده الشكل المقترح للعمل ..يارب يعجبكم..

الحملة بتاعتنا زى ماقلنا حتنقسم الى جزئين:
1 اصلاح النفس
2 اصلاح الاخرين

نقسمها جزئين ...الاول اصلاح النفس
وحينقسم الى

انا والقران....

وده حيقوم على اننا نحفظ كل يوم ايتين بس...نبقى فى خلال اسبوع حفظنا 15 ايه..من اى سورة بقى حنتفق عليها...ونرجع نراجعه ونناقش التفسير مع مجموعتنا..تمام..وكمان خلال الشهرين اللى جايين بجانب حفظنا العادى اللى حنراجعه كل اسبوع ..حنحاول نحفظ معاه الجزئين الاخيرين لانهم سهلين وحافظين معظمهم يعنى ان شاء الله على عشر ذى الحجة نقوم بيهم الليل...ايه رايك؟؟..ونكمل بقى علطول طول السنة على الايتين بتوع اليوم...

التانى بقى ..
اناو سنةالرسول..

وده حيكون قايم على اننا خلال اسبوع نحفظ 3 احاديث بس مهما كانو صغيرين مش مهم.. يعنى كل يومين حديث..نحفظهم كويس بشرحهم والقران طبعا بتفسيره برضه..ونرجع نناقش ايه اللى فاهمناه مع مجموعتنا...اظن مفيش اسهل من كده..

لقسم التالت ..
انا ومعرفة دينى ...

وده حيكون قايم ان احنا حنزل مجموعة كتب باسمائها ونخلى كل حد يبقى لازم عنده الكتب دى ..ونقرا على قد منقدر وكل شهر نختم كتاب سواء سيرة او فقه او توحيد وكلها حاجات للمبتدئين...ايه رايك..يعنى حنعمل لنفسنا ثقافة دينية جامدة باذن الله...

وكمان بقى وده المهم.. حديلك طرق يسيرة تساعد على الحاجات دى...عشان متقولش مفيش وقت...
يعنى حنقول مثلا ان اى حد فينا سواء شغل او كليه بيروح فى مواصلات فحنقسمهالهم ..تحفظ ايه وانت رايح وايه وانت جاى ...اظن مفيش اسهل من كده...والحديث كل واحد يبقى معاه فى جيبه كتيب صغير للا حاديث ...كل يومين يحفظ واحد ويراجع عليه..وبرضه ممكن فى مواصلاته...والكتاب بقى تلت ساعة قبل متنام يعنى بمعدل عشر ورقات فى اليوم قراءة حتخلص فى الشهر 300 ورقة....عشان الناس اللى بتقول معندهاش وقت...اظن حليناها مفيش حجة بقى...ايه رايك؟؟

اخر جزء فى اصلاح النفس ..
انا وترك المعاصى...

كل واحد فينا حيختار ذنب معين هو عارفه ويجاهد نفسه طول الاسبوع يحاول يسيبه..الكدب مثلا او الغيبة...ويجى بعد كده يقولنا هو عمل ايه ومش شرط يقول ع الذنب...تمام..

طيب الجزء بتاع اصلاح الاخرين بقى..

بسيط جدا عشان الناس اللى بتقول مش حنعرف نكلم حد...
كل الحكاية الحاجات اللى انت حفظتها...حتحاول بطريقة بسيطة جدا تشرح شرحها الللى انت عرفته لاى حد بالطريقة العامية يعنى...

لو ملقتش حد يبقى فى اهلك بس...مثلا يعنى يبقى الكلام ازاى...يقول انا عرفت النهردة حاجة عمرى مكنت اعرفها... ويبتدى يتكلم بطريقة تخلى اللى قدامه يحب ربنا اوى وتخليه ممكن يفكر يقرا الاية دى او الحديث ويدور عليه..

وطبعا الناس اللى تقدر تتكلم عن الحاجات دى فى مسجد الكلية ياريت او درس علم يعملوه مع اصحابهم...
والحاجات دى حتفضل بجانب المشروعات اللى حنزلها بعد كده...

قبل ده كله حندى توصيات خاصة بالمظهر العام سواء للبنات او الشباب يعنى البنات تغير لبسها شوية ..والولاد طريقة كلامهم وتعاملهم ...

والابتسامة متفارقش وش حد فينا بحيث اننا نبقى معروفين من شكلنا واخلاقنا اننا فريق بنحبك يارب..ونخلى الناس تثق فينا وتيجى تقولينا مشاكلهم...عشان بعد كده لما نتفق على اى مشروع يبقى الناس تتجاوب معانا لانهم عارفينا كويس وواثقين فينا ..واحنا محبوبين عندهم...وده طبعا بين اصحابنا او اهلنا او زمايلنا فى الكلية...

ودى كده اول حاجات بعد مانبقى جامدين حنبتدى بقى ننزل مشاريع نعملها زى بتاعة الصحوبية والتدخين وغيرها..لان بعد كده اكيد حيبقى عندنا ثقة نتكلم مع الناس وعندنا شوية علم...

انا عايز اعرف رايكم ايه...الناس اللى مسافرة مش مهم ممكن يبتدوا اول اسبوع هما باى سورة يختاروها..او يستنوا لحد يوم الجمعة مثلا نكون اتفقنا وعرفنا الناس...

موضوع الاستيكر اللى يقدر يعمله يعمله..اللى ميقدرش ياريت يطبع الصور زى ماقلنا ويكتب عليها حاجة تشد اللى يقراها ..بحيث يعنى اللى عنده مشكلة مثلا يلجالنا او اللى عايز يشارك معانا وهكذا..وممكن ابسط حاجة تحطها فى عمارتك او فى مسجد الكلية او المدرسة او مكتبك فى الشغل..اظن بنسهلها اوى اهو...

مش لدواعى امنية ولا حاجة ..ماالناس كلها عاملة حملات زى حياة بلا تدخين وحملة خليك راجل..مادام حاجة فى النور يبقى منخافش..

ياريت يكون اللى حنمشى عليه عجبكم...وكمان الناس اللى كانت معانا وانسحبت...بنقولكم بجد احنا مستنيينكم...مفيش حجه اهو...ولو حتى مش حتشارك معانا متبخلش على نفسك بالاجر حتى من غير ماتعرفنا تابع معانا..

والله العظيم يااخوانا ..لو الموضوع ده طلع فى الاخر واحد اتهدى على ايدنا..ولا طلعنا واحد يعرف يبقى داعية لربنا...يبقى طظ فى الدنيا واللى فيها..ويبقى حققنا اللى احنا عيزينه..واحد بس والله..

ربنا يحبكم ومستنيكم ..وياريت تردوا باقتباس ..وياريت اختى فراشة تنقلو فى المنتدى بتاعنا..اللى عايزكم كلكم تشاركوا فيه...

اخوكم عبد الله الفقير..محمد طه

جزاك الله خيرا أ/ محمد ربنا يعز بيكى الدين

بجد ما شاء الله على الحاجات اللى قولتها ربنا يقدرنا على تنفيذها

ونفسى بجد اننا نكتر كده ونبقى مجموعه كبيرة للاسف انا حاسه بفتور جامد

يااااااااااارب اهدينا جميعنا واجمعنا جميعا على قلب رجل واحد

جزاك الله كل خير
وبجد لازم نجمع اكبر عدد ونشتغل وربنا يعنيا

السلام عليكم ورحمة الله وبركاته
جزاكم الله خيرا
صراحة لم أكن أعلم بموضوع الحملة
وفرحت ججدا
لأن السلسلة كانت راائعة
أتمنى الانضمام معكم ان شاء الله

شكرا لاخت ايمان واخت نادية..وربنا ييسر النهردة وننزل تلخيصات اول اسبوع....
اخت قرانى جنتى..طبعا حضرتك معانا من غير استئذان ..وقسم الحملة حتلاقى فيه كل اللى انتى محتاجاه...
ربنا يوفقنا جميعا الى مايحب ويرضى...جزاكم الله خير وربنا يعزكم...

جزاك الله خيرا يااخى .. ربنا يبارك فيك.. وان شاء الله عن قريب يكون للفريق جمعيه مشهرة بأسمها عشان محدش يكون ليه عندنا حاجه ..بس خليكو جدعان ومتنسوش السويس ..وانا كنت عاوزة اعمل استيكرات عليها اسم الفريق وموقعه ع النت والفيس بوك ..يعنى يكون دعايه للفريق ع النت وبره النت.. بس مش عارفه فيه واحد جاهز للفريق ولا اصمم واحد؟ ياريت لو حد يقدر يفيدنى..وجزاكم الله خيرا

السلام عليكم ورحمة الله وبركاته
ماشاء الله بجد رااااااااااااااااااائع راااااائع جزاكم الله خيرا جميعا
جزاك الله خيرا أستاذنا الكريم على الأفكار الرائعة انا شفت الموضوع متأخر قوي بس الحمد لله اهم حاجة نبتدي بجد وانا شايفة الناس بتقول عندنا فتور والله كلنا كدة بس لما تكون الطاعة عارفين اننا كلنا مشتركين فيها وان احنا صحبة صالحة بنعملها في نفس الوقت ده بيدينا حماسة كبيرة قوي,والله ياجماعة لما ببقى عاوزة اعمل حاجة ومكسلة عنها بدور على ناس تعملها معايا لأن دايما يد الله فوق الجماعة
ويااااااااارب فعلا اقدر اعمل حاجة ولو صغيرة لديني اقدر اقابل بيها ربنا واكون من رفقاء النبي في الجنة وكفاية بجد ان الحاجة دي هتجمعني بكل الناس اللي بحبهم يوم القيامة على منابر من نور
رزقكم ربي الأخلاص في القول والعمل ياااااااااااااااارب وجمعنا واياكم تحت ظله
ودايما لازم نردد (الهمة على قدر المهمة)0
دمتم في رعاية الله

ماذا اقول لكم
انى احسد نفسى على تواجدى معكم
حقيقى أكثر من رائع
ياالله
عجزت كلماتى عن وصف روعه الفريق
عجزت كلماتى عن وصف جمال هذا الفريق
بارك الله فيكى اخى الكريم
وباااااااااااارك الله فى كل اخواتى وحبيبات قلبى
ان شاء الله هبتدأى بالطريقه دى من الاسبوع القادم ان شاء الله
جزاكم الله خير جزااااااااااء
يا اجمل واروع واحلى صحبه صالحه

السلام عليكم ورحمة الله وبركاته
جزاك الله خير استاذ محمد طه ربنا يرزقنا كل عمل صالح يرضاه
والطريقة العمل جميل جدااااااااااااا
وباذن الله نمشى كلنا عليها
ربنا يهدينا
جزاك الله خير

جزاك الله خيرا يا أستاذ محمد

ربنا يوفقك خير ويوفقنا لما نحبه ونرضى