شاركوا معانا في حملة الاستعداد للشهر الكريم(مرحب شهر الصوم)

السلام عليكم ورحمة الله وبركاته
اخواني واخواتي كل سنة وانتوا طيبين ومن طاعة ربنا قريبين
ساعات قليلة ويهل علينا هلال شهر رجب ،ايه ده رجب جه يا جماعة يعني رمضان خلاص عالابواب ،يعني خلاص من النهاردة لسانا مش حيبطل يدعي(اللهم بلغنا رمضان)،ايوا من النهاردة والمفروض كمان نكون بندعي بالدعوة دي من 4 شهور فاتوا اقتداء برسولنا الكريم صلوات ربي وسلامه عليه والصحابة رضي الله عنهم وارضاهم اللي كانوا يفضلوا 6 شهور قبل رمضان يدعوا ربنا يبلغهم رمضان ،لكن اللي مبتداش يلا مع بعض نبتدي من النهاردة (اللهم بلغنا رمضان)
ياتري يا جماعة مستعدين ولا لسة ،لسة القلوب بعيدة عن روحانيات ورقائق رمضان ،ولا ابتدينا نحس برحمات ربنا اللي بتغرقنا في رمضان ،طاب مشتاقين لليالي رمضان الجميلة ،ايه يا جماعة قلوبكم حست واشتاقت لليالي العتق من النار ولا لسة؟اشتقنا للعفو ولليلة القدر ،اشتقنا لشهر بتفتح فيه ابواب الجنة وتغلق فيه ابواب النار ،اشتقنا لكل لحظة حلوة بنعيشها في اعظم شهر واكرم ضيف علينا (رمضان)
طاب ايه رأيكم يلا بينا مع بعض نعمل حملة استعداد للضيف الكريم اللي بيغرقنا بكرمه ،يلا نعمل استعداد لاعظم ضيف بينور حياتنا لايام معدودات ،يلا حنبتدي مع بعض من دلوقتي ،ايوا من دلوقتي ،جوارحنا وعقولنا وقلوبنا لازم تستعد ،حياتنا كلها لازم تتهيأ للضيف الكريم.
يلا نعلي الهمة ،يلا نرقق قلوبنا ،يلا نعيش من دلوقتي في رمضان ،يلا نوري ربنا من انفسنا خيرا ،يلا نتعرض لنفحات ربنا الجميلة ،يلا نكون بجد مستحقين الرحمة والمغفرة والعتق من النار،يلا من النهاردة ننوي نفوز بليلة القدر وبثوابها العظيم.
ايه يا جماعة قلوبنا فين دلوقتي،قلوبنا ارتقت كدة وافتكرت ايام ربنا الجميلة ،ابتدينا نعيش الجو الرمضاني بقلوبنا ؟
طاب يلا من غير ما اطول عليكم نبتدي استعدادنا بشكل عملي :
*الخطوة الاولي واللي بجد اهم خطوة في استعدادنا لرمضان(التوبة)يلا نتوب يا جماعة ،لو في حد فينا مصر علي معصية حقوله واقول لنفسي يلا نتوب ،يلا نتوب بقي ده رمضان اللي داخل علينا مش حاجة بسيطة ده شهر العتق من النار يا جماعة،دي فرصة عمرنا ،دي ايام ممكن تكون فيها نجاتنا ،يلا نندم ونوقف الذنوب ونعزم النية علي عدم العودة للي يغضب ربنا من تاني ،ايه رأيكم نتوب توبة عامةوشاملة من كل ذنوبنا ،تيجوا نفتح صفحة جديدة مع ربنا ، يلا نردد مع بعض(تبنا الي الله ورجعنا الي الله وندمنا علي ما فعلنا ) يلا يا جماعة قولوا معاياالله علي التوبة، تعرفوا احنا دلوقتي بمشئية الرحمن وصدق نيتنا مع الله ذنوبنا اتحولت حسنات .
يلا بقي يا قلوب محبها لربها ولنبيها ولدينها يلا ندخل عالخطوة التانية في خطوات استعدادنا لضيفنا الكريم
*فين همتنا بقي في قيام الليل طبعا ما ننساش ان من قام رمضان ايمانا واحتسابا غفر له ما تقدم من ذنبه
يلا بقي نبتدي نعلي همتنا في القيام ،يلا اللي بيصلي ركعتين في اليوم يزود واللي مقصر في القيام يبتدي من النهاردة ركعتين كدة ونزود واحدة واحدة،والله لو كان القيام في التلت الاخير من الليل ،يلا كدة نجهز قلوبنا ونشيل التراب اللي عليها،يلا نقرب من حبيبنا وما تخافوش مش حيسيبنا .
*خطوتنا التالتة حتكون ايه القران،يلا كدة نمسك مصحفنا ونفتحه ونزود كدة وردنا اليومي ،ايوا طبعا حنزود ده رمضان يا جماعة ،يعني احنا داخلين علي شهر القران .
مسكنا مصحفنا وحنقرا ،لا نستني قبل ما نقرا نتفق مع بعض اتفاق ،احنا حنقرا ازاي؟حنقرا بلسانا بس ولا ايه؟
لا طبعا لسانا بس ده ايه يلا كدة مع بعض نحضر قلوبنا ونفتحها لاستقبال اجمل رسايل ربنا باعتهالنا في اعظم كتاب ،يلا كدة نغذي ارواحنا بالقران .
*ندخل علي الخطوة اللي بعدها ،اللي مقصر في السنن يا جماعة ، يلا نبتدي نتعود عالمواظبة عليها،اوعوا يا جماعة حد فينا يكسل ،احنا مش عارفين ولا ايه ان ثواب السنة في رمضان بفرض ،في حد يسيب الثواب العظيم ده بردوا؟؟؟
*نيجي بقي للدعاء كلنا بقي بنجهز دعوات مخصوصة في رمضان وبنبقي عارفين ومتيقنين بالاستجابة ،يلا نجهز من دلوقتي ،يلا بقي نبتدي ندعي وندعي وندعي ،يلا كدة نذل نفسنا لحبيبنا ، يلا كدة نخشع ونبكي
يلا نبتدي نعيش اكتر مع احلي عبادة في أي وقت وخاصة في رمضان ، يلا كدة نعود ايدينا علي رفعتها في الدعاء بذل وخشوع لحبيبنا الله.
*حاجة مهمة جدا يا جماعة ياريت ما ننسهاش صلة الرحم اللي قاطع رحم من رحمه يجري بسرعة ويوصله ،لان كلنا عارفين ان الرحمة لا تتنزل علي قاطع رحم ،ايه عايزين نخسر رحمات رمضان علي شوية مشاكل بسيطة في الدنيا ،يلا نوصل من قطعنا ،ده احنا هدفنا الجنة يا جماعة .
*بصوا بقي اقولكم علي خطوة مهمة جدا جدا جدا وبتنقي وترقق قلوبنا بطريقة غريبة جدا ومن غير ما نحس والله ده غير ان احنا بيها بنضمن ظل عرش ربنا يوم لا ظل الا ظله ،الخطوة دي هي كسب طيب وتبقي مستشعر بقلبك حديث حبيبك المصطفي (من تصدق بعدل تمرة من كسب طيب والله لا يقبل الا طيبا فان الله يتقبلها بيمينه ويربيها لصاحبها كما يربي احدكم فلوه ،حتي يلقي الله والتمرة مثل جبل احد من الحسنات)صدق رسول الله صلي الله عليه وسلم
ياريت بقي نخلي الصدقة يومية حتي لو كانت صدقة قليلة وانا اسفة في كلمة قليلة دي لان مفيش حاجة قليلة عند ربنا (ومن يعمل مثقال ذرة خيرا يره ومن يعمل مثقال ذرة شرا يره) صدق الله العظيم
وقال حبيبي رسول الله(لا تحقرن من المعروف شيئا)صدق رسول الله
واللي ميقدرش يخرج كل يوم عشان يطلع صدقة ممكن يطلعها ويحطها في مكان مخصوص بنية الصدقة لحد ما ربنا ييسرله اخراجها .
طاب ممكن تستحملوني شوية واقول حاجة في نقطة الصدقة دي،شنطة رمضان ،طبعا معظمنا عارف فكرة شنطة رمضان واللي ببساطة بيكون فيها معظم احتياجات البيت الضرورية من مواد غذائية وبتتقدم للفقراء وطبعا بيكون ثوابها عظيم جداااااااااااااا واهم ثوابين حناخدهم (1)افطار صائم ،قال رسول الله صلي الله عليه وسلم
(من فطر صائما كان له مثل اجره من غير ان ينقص من اجر الصائم شيئا وكان مغفرة لذنوبه وعتقا لرقبته من النار) صدق رسول الله صلي الله عليه وسلم
الله علي الثواب العظيم ده ،طاب في ثواب كمان (2)ادخال السرور علي مسلم ،قال رسول الله صلي الله عليه وسلم(من ادخل السرور علي اهل بيت من المسلمين لم يجد الله له جزاء الا الجنة )صدق رسول الله
شفتوا يا جماعة حاجة بسيطة جدا ومش حتكلفنا كتير والله حتبقي مكافأة ربنا لينا عليها الجنة ، الله علي المكافأة دي،بالله عليكم في احلي من كدة مكافأة.
ياريت يا جماعة كلنا نشارك في مشروع شنطة رمضان ده ،والله حتفرق معانا الحكاية دي كتير ،بتعمل تغيير جذري للقلوب بترقق القلب القاسي(واسألوا مجرب)
بصوا يا جماعة هدفنا من الحملة باختصار هو تجهيز قلوبنا عشان العبادات تبقي يسيرة علينا ،اكيد كلنا عارفين حالة قلوبنا اللي بتبقي عليها في رمضان ولو قارناها بحالة قلوبنا دلوقتي حنلاقي ان احنا قلوبنا بعيدة كل البعد عن الحالة الايمانية الجميلة اللي بنكون عايشينها في رمضان ،يبقي يوم ما نجهز قلوبنا حتبقي كل حاجة سهلة ،يوم ما حنطلب نصلي ركعتين حنلاقي نفسنا بنصلي عشرة ،يوم ما نقول نقرا جزء قران حتلاقي نفسك بتقرا جزئين ،يوم ما نقول ندعي ونرفع ايدينا حتي ولو 10 دقايق في اليوم حنلاقي نفسنا مش عايزين ننزل ايدينا ومش عايزين نخلص دعاء،مش عايزين نطلع من حالة القرب والخشوع الجميلة.
خطواتنا باذن الله سهلة وبسيطة وربنا وعدنا انه حياخد بايدينا ،ايه مش فاكرين الحديث القدسي اللي حبيبنا الله قال فيه(من تقرب مني شبرا تقربت منه ذراعا ومن تقرب مني ذراعا تقربت منه باعا ومن اتاني يمشي اتيته هرولة )
واحنا بنقول جايين لطريقك يارب العالمين حنعبدك ونخلص في عبادتك وهدفنا هو رضاك وجنتك وعتقك لينا من النار.
اخواني واخواتي اللي حابب يشارك معانا في حملة الاستعداد لرمضان يدخل معانا وانا بعون الله حسجل هنا في الصفحة دي اسماء كل المشاركين في الحملة ،اسمائنا يا جماعة اللي حنكتبها بعون الله نقابل بيها ربنا يوم القيامة ونقوله احنا بأسمائنا ومشاراكتنا في حملتنا دي يارب كنا عايزين نقربلك وندخل رمضان واحنا مقبلين علي طاعتك وحنطلب من ربنا اننا بنيتنا الصادقة باذن الله ان يمن علينا بالعتق من النار في ضيفنا الكريم اللي حيهل علينا قريب .
وياريت اللي عنده اقتراح لطاعة معينة ننفذها مع بعض في حملتنا يشاركنا بيها .يلاحستني مشاراكاتكم وحكتب اسم كل مشترك ومشتركة معانا في الحملة هنا في الصفحة الاولي وحدعي ربنا من كل قلبي ان كل اسم حيكتكتب في الصفحة دي يجعله من عتقاءه من النار وكل امة حبيبك محمد يارب(يارب ده ظننا فيك يارب)
يارب نيتنا في حملتنا طاعتك والفوز بجنتك وشعارنا لرمضان (لن يسبقنا الي الله احد)
منتظرة مشاراكتكم يلا عايزين اسماء كتير ،يلا احنا ظننا في الله انه حيعتقنا من النار ،يلا نسطر اسمائنا ونفوز بالعتق من النار بحسن ظننا بالله والي طبعا حيكون مقترن بعملنا بأجمل طاعة لله رب العالمين .
أسماء المشاركين في الحملة
1-أسماء طه
2-قراني جنتي
3-ايمان شعراوي
4-مريم البتول
5-أمة الله 777
6-سأحيا بالقران

وعليكم السلام ورحمة الله وبركاته

طبعا لاتعبق على الأسلوب الرائع

والله ياأسماء شوقتينا لرمضان وروحانياته وأيامه الجميلة

ربنا يبلغنا كللللللنا رمضان السنة دى

وطبعا معاكم وربنا يتقبل منا جميعا ياااااااااارب

بجد كلامك حلو أوى ماشاء الله
ربنا يزيدك ويفتح عليكى كمان وكمان يااااارب

بحبك فى الله

وعليكى السلام ورحمة الله وبركاته

وااااااااا شوقاااااااااااااه يارمضااااااااان

اللهم بلغنااااااااااا رمضاااااااااااااااان

جزاكى ربى الفردوس الاعلى حبيبتى اسماء

ما شاء الله لا قوة الا بالله

والله مش لقيا كلام اقوله اعبر عن جمال موضوعك

موضوع رائع بمعنى الكلمه

ربنا يعزك يارب

وبمشيئه الله انا معاكم باللى يقدرنى عليه ربنا

ربنا يجعل هذه الحمله فى ميزان حسناتك

ونفع الله بك الاسلام والمسلمين

بحبك فى الله

[b]

وعليكم السلام ورحمة الله وبركاته
حبيبتى اسماء ماشاء الله عليكى ربنا يكرمك ويزيدك طاعة وينفع بيكى الاسلام والمسلمين يارب
وانتى طبعا دايما سباقة للخير ربنا يباركلك يارب عايزيين كده نعمل زى لاعب الكورة بيسخن قبل ماينزل الماتش بيسخن وبيتدرب جامد وبيجهد نفسه علشان يفوز
احنا عايزين نعمل كده ندرب نفسنا على كل اللى قولتى عليه ده علشان لما ييجى رمضان نقدر نفوز باكبر قدر من الحسنات ونفوز بالعتق من النار ونفوز حب ربنا وحاجات كثثثثثير اوى ......ده رمضان ؟؟ شهر الرحمة والغفران والعتق من النيران
اللهم بلغنا رمضان
اللهم بلغنا رمضان
اللهم بلغنا رمضان
يااااااااااارب
وعايزين كمان نجدد ونستحضر نيتنا فى كل عمل نعمله بجد الحاجة دى بيبقى احساسها جميل اوى يعنى لما تعملى اى حاجة ونستحضرى النية انى بعمل كده ارضاء لحبيبى ارضاء لربى تبارك وتعالى بجد بتحسى بحلاوة الايمان ولذة القرب من الله انك بتعملى كل حاجة وربنا معاكى شاهد عليكى ناظرك والله احساس جميل ربنا يتقبل اعمالنا الطيبة يارب ويجعلها زخر لينا يوم ان نلقاه
جزاكى الله خيرا حبيبتى على موضوعك وانا كتبت الحاجات الاساسية فيه زى القران وقيام الليل وصلة الرحم وكل اللى انتى ذكرتيه ده فى ورقة عندى علشان افتكرهم ويكونوا دايما ادامى ويشجعونى باذن الله على مداومة الطاعة والعبادة
ربنا يعينا ويقوينا جميعا على الخير
وباذن الله ندخل كل فترة كده ننشط الموضوع ونشوف مين اللى ماشى معانا بخطوات ثابتة باذن الله كنوع من التشجيع واكيد الفائز فينا اكثرنا طاعة .....نشد حيلنا وباذن الله كلنا فائزين بجنة الله تبارك وتعالى
وفى ذلك فلينافس المتنافسون
وانا طبعا معاكم فى اسماء المشتركين فى الحملة الرائعة دى حبيبتى
بقينا كده 4 ةالباقية تاتى باذن الله
1 - اسماء طه
2 - قرانى جنتى
3 - ايمان شعراوى
4 - مريم البتول
اسال الله كما جمعنا فى دنيا فانية ان يجمعنا فى جنة قطوفها دانية
بحبكم فى الله

[b]ما شاء الله
بجد موضوع هايل
ربنا يبارك فيكى ويجعله فى ميزان حسناتك
وطبعا ياقمر انا معاكم بعنى انا رقم 5 بإذن الله
واللهم بلغنا رمضان وليله القدر ياااااااااارب
اللهم ان عفو كريم تحب العفو فعفوا عنااااا

وعليكم السلام ورحمة الله
ماشاء الله
اللهم بلغنا رمضاااان
جزاكى ربى الفردوس الاعلى حبيبتى اسماء ربنا يكرمك على اسلوبك فى طرح الموضوع الجميل ده
فعلا لازم كلنا نحضر لرمضان
اللهم بلغنا رمضان
وان شاء الله معاكم طبعا فى الحمله
ربنا يعزك ويحبك
وجعله الله فى ميزان حسناتك
بحبك فى الله

السلام عليكم ورحمة الله وبركاته

ماشاء الله
جزاكى الله كل خييييييييير يا اسماء
اللهم اعنا على ذكرك وشكرك وحسن عبادتك

الهم بلغنا رمضان
اللهم بلغنا رمضان
اللهم بلغنا رمضان

بجد ماشاء الله عليكم شوقتونا لرمضان
انا نفسى يجى النهاردة قبل بكرة
وياريت تقبلونى معاكم
الله ارزقنا حبك وحب من يحبك وحب عمل يقربنا لحبك

السلام عليكم
جزاكي الله خيرا علي الموضوع ماشاء اسلوبك رائع
لازم نعود نفسنا وندرب نفسنا من دلوقتي علي الصيام والقران والصدقة وصلة الارحام والذكر كل اللي حضرتك قولتيه علشان منجيش نتحمس في اول رمضان ويجيلنا فتورو نتعب وممكن كمان ننسخ شرايط وسيديهات كيف نستقبل رمضان لعمروخالد
ونوزعها علي صحابنا وفي المواصلات وان شاء الله اكون معاكم في الحملة ونقدر نعمل حاجة بجد خالصة لربنا وجزاكم الله خيرا