الحلقة التاسعة من يوميات عمر وسارة

[
justify]
السلام عليكم ورحمة الله وبركاته
الحلقة التاسعة من يوميات اتنين مخطوبين
قــالت ســارة:
"آدي آخرة اللي يسمع كلام العيال .. معقول نلحق نجهّز كل حاجة في الكام يوم دول؟ الله يسامحك يا سارة" ..
هذه كانت عينة صغيرة من القذائف التي تنهال على رأسي كل دقيقة من أمي وأبي بعد ما أقنعتهم بكل وسائل الزنّ والإلحاح المعروفة عند البنات أن تكون حفلة خطوبتنا أنا وعمر بعد أسبوعين .. يعني أكسر كلام سي السيد؟!!
وبعد صاعقة المفاجأة التي هبطت على رأس أمي وأبي من الميعاد المفاجىء العيالي على حد وصفهم، وبعد الرجاء المتواصل من جانبي، وافقوا على مضض على أن تكون الحفلة في بيتنا على الضيق تجمع الأسرتين فقط .. وأعجبني الحل ده جداً، لأني أصلاً لا أحب حفلات الخطوبة في الأماكن العامة، لأن العروسين لا يكونوا يربطهم شيء وفي بداية التعارف .. يبقى ليه نفرّج الدنيا كلها علينا؟ .. مش يمكن ما يحصلش نصيب؟؟؟

قــال عمــر:
"الخطوبة فى البيت؟ .. ليه بقى إن شاء الله هو احنا عندنا كام عمر؟ .. ما ينفعش الكلام ده أبداً .."
هذه كانت عينة صغيرة من القنابل التي كانت تلقيها أمي على أذني عندما علمت بموضوع حفلة الخطوبة المنزلية .. ولما كنت لا أريد أن تتكرر مأساة الشبكة مرة أخرى، أخبرت أمي أنني أنا وسارة متفقين على هذا، ولا داعي أبداً أن تفتح هذا الموضوع معهم .. وبعد إلحاح كبير جداً وافقت على مضض، مشيرة إلى أنني من دلوقتي ح امشى ورا كلام الست هانم .. طبعاً عملت نفسي مش سامع ولا عارف مين هيّ الست هانم المذكورة!!

قــالت ســارة:
بجد أنا مجنونة إني وافقت عمر .. طب هو ح يشتري بدلة فى نص ساعة؟ طب وأنا ح اعمل إيه فى الفستان؟ ده حدوتة كبيرة جداً ..
وللأسف لم أجد في الجاهز شيء يناسبني بعدما تطوعت صديقة مقاتلة لي أن تلف معي على المحلات .. وبعد 3 أيام متواصلة من اللف المتواصل وبعد ما أصابنا كساح وشلل رباعي من كتر المشي توصلنا إلى نتيجة رائعة مفادها أن كل ملابس السواريهات الآن مصممة للسباحة وليس للحفلات .. ما شاء الله كله عريان جداً جداً وكأن الطبيعي جداً ان البنات تلبس الكوارث دي!!! .. وكل ما كنت أسأل على شىء يصلح للمحجبات كانت البائعة تخرج لي شيء ملائم تماماً لماما أو لحماتي العزيزة، لكن شيء شبابى محتشم لاااا يمكن .. ليييييه مااااعرفش؟

قــال عمــر:
"والله وبقيت عريس يا واد يا عمر" .. قالها صديقي وأنا أقيس البدلة الفاخرة التى اشتريتها بتحويشة العمر، وجدناها في المحل الذى أتعامل معه دوماً .. بس لسه الكرافتة .. قال البائع إنها موجودة في الدور التاني من المحل .. ياااه لسه ح اطلع؟ .. ده مفيش اسانسير .. الظاهر الجواز ده كله ارهاااااااق ..

قــالت ســارة:
"خلاص بقى كفاية عياط موتّي نفسك يا بنتي، خلاص فصّلي الفستان ويارب صاحبة الاتيليية ترضى تخلّصه بسرعة"
قالتها لي ماما بعد ساعتين من البكاء المتواصل وأنا أحكي لها رحلتي الفاشلة اليومية بين المحلات، وقد تورمت أصابع قدمي وأصبحت فى حجم الكورة الشراب .. وأكيد صديقتي ح تقطع علاقتها بيّ بعد العذاب اللي وريتهولها والكساح الذي أصابها .. لا و ح اتفرس إني اتصلت بعمر لقيته صاحي من النوم تعبان علشان نزل اشترى البدلة في نص ساعة زي ماتوقعت ..
لا صحيح بجد الرجالة دول بيتعبوا ..

قــال عمــر:
انا مش عارف سارة مكبّرة موضوع الفستان ليه؟ .. ما أي حاجة وخلاص .. صحيح البنات دول فاضيين ورايقين أوي .. وبعدين ح تفصله أخيراً، وما رضيتش تقولّي لونه إيه علشان المفاجأة ..
ربنا يستر ويليق على البدلة أحسن يبقى شكلنا آخر بيئة .. بجد البنات دول عليهم تقاليع عجب ..

قــالت ســارة:
أمامي ألف مجلة أختار منها الموديل، وفي الآخر رميت كل المجلات وأخرجت قلم وورقة وقعدت أرسم مليون تصميم وكلهم طلعوا وحشين جداً .. ياربي ليه البنات على طول تعبانين فى كل حاجة من الصغيرة للكبيرة؟
انا ح اسيب صاحبة الأتيلييه تختار حاجة مناسبة ليّ وخلاص .. هو يعني فرح الأميرة ديانا؟؟ .. قلتها فى سري وهي تجلس أمامي من عشر ساعات تنتظر اختياري النهائي، وهي ح تطقّ مني .. وبعد طول عذاب "اختارَنا" الموديل أنا وهي وتنفستْ الصعداء وهي تكاد تطردني من المحل وتقول بابتسامة طهقانة: والفرح إمتى ان شاء الله يا عروسة؟ .. رديت وأنا أكاد أجري من أمامها من رد فعلها المتوقع: "بعد عشر أيام" .. وكان الرد: "إييييييه!!! مووووش مممكن ابداااا" ..

قــال عمــر:
ح أضطر أسيب ذقني ما احلقهاش اليومين دول، ولا شعري كمان حسب تعليمات الكوافير، وأستحمل التريقة من أصحابي والعيلة عندنا .. يالاّ أهو الواحد لازم يضحّي ويتعب علشان يتجوّز ..

قــالت ســارة:
خلّصت كل أنواع الماسكات والسنفرة والكريمات المعروفة والمجهولة، وأي واحدة كانت بتقترح عليّا وصفة للبشرة أو الإيدين أجرّبها فوراً .. وأصبحت غرفتي عبارة عن مطبخ به أعاجيب الدنيا السبعتاشر من قشر خوخ .. بياض بيض .. جلسرين وليمون .. زبادي وعسل .. وأي شىء أجده فى التلاجة عند ماما أنقض عليه فوراً وأجري عليه تجاربي الجهنمية ..
انا عاوزة أعرف كل البنات بيتعذبوا العذاب ده ولاّ انا بس اللي لاسعة؟!! بس كله يهون علشان خاطر عيونك يا عمر ..

ترتيبات يوم الخطوبة

قــالت ســارة:
أكاد أفتح عيوني بالعافية وأغالب النوم بقوة وأنا جالسة عند الكوافيرة .. إمبارح سهرت فى الأتيليه علشان أخلّص الفستان .. وكانت خناقة كبيرة بيني وبين عمر على الموبيل لما لقاني الساعة 11 لسه مارجعتش البيت، رغم إن ماما كانت معايا وبابا وصلنا بالعربية الساعة 12 ونصف، بعد ما خلص الفستان أخيييييييراً .. ورغم كده عمر كان بيتخانق بمعدل كل ربع ساعة .. ويقولّي خلاص إللي خلص من الفستان كفاية، ومش مهم الباقي وكفاية تأخير ..
يعنى اخده بكم آه وكم لأ ؟!! .. يالاّ أهو تغيير برضه ..
طب أنا ذنبي ايه في كل الدوشة دي؟ .. هو زعلان منى ليه؟ .. وعلشان اليوم ما يقلبش نكد أرسلت له رسالة قبل ما أروح للكوافير قلتله: أنا آسفة على تأخير إمبارح .. أنا نفسي أكون جميلة علشان أليق بيك النهاردة ..
وطبعا اتصل بي فورا وكان فى منتهى الرقة .. آه من عقل الرجالة ..!

قــال عمــر:
رسالة سارة الجميلة إمتصت كل غضبي .. فعلاً سارة ذكية جداً وبتعرف إمتى توقف المشكلة بيني وبينها .. أنا مش مصدق إن النهاردة ح ابقى عريس بجد!! .. أصحابي كل شوية يكلموني و يبعتولي مسجات ملخصها كلها: بكرة تندم يا جميل ..
معقول الجواز يبقى خنقة وجحيم زي ما بيقولوا؟ .. لا أعتقد .. لأن أنا وسارة متوافقين فى الشخصية وطريقة التفكير و... والمشاعر كمان .. يبقى الفشل ح ييجي منين؟
قمت توضئت وصليت ركعتين قضاء حاجة أن يوفقنا الله أنا وسارة طول العمر ..

قــال ســارة:
أنا بجد خلاص ح انفجر .. من 4 ساعات وأنا عند الكوافيرة ولا أفعل شىء .. المحل فيه 7 عرايس غيري!! .. بجد كأننا في سيرك .. الحرارة عالية جداً .. والعرايس كلهم متوترين وخايفين يتأخروا عن ميعادهم، وكلهم بيتحايلوا على الكوافيرة علشان تخلّصهم كلهم مع بعض .. ازاي ما أعرفش ..
عملتْ لي ماسك أول ما جيت الصبح، وعملت شعري رغم اني ح أغطيه!! .. يعني باختصار لسه ما عملتش حاجة خالص، والساعة 4 وعمر حييجى الساعة 7 ..
كلمني عمر وسألني: عملتي إيه؟
قلت له: ولا حاجة خالص .. وصوتي مخنوق بالبكاء ..
قال لي: ولا يهمك، إنتي قمر من غير حاجة .. طيب أكلتي حاجة ياسارة؟
رديت باستغراب: أكل؟! .. يعني إيه الكلمة الغريبة دي؟

قــال عمــر:
سارة عاملة زي الأطفال .. لازم حد يتحايل عليها علشان تاكل .. اتصلتْ بمطعم بيتزا وأعطيته عنوان الكوافيرة كي يرسل لها طعام .. ورأتني أمى وأنا أرتب هذا وكادت أن تنطق بعصبية جملة بها: "ست الحسن" كالمعتاد ..
ولأول مرة أرى في عينيها نظرة تشبه الغيرة .. وبدل أن أعاتبها وتقلب نكد كالعادة أخذتها فى حضني وقلتلها: عارفة يا ماما انا باحب سارة ليه؟ .. علشان نسخة منك .. بس انتي الأصل يا جميل والباقي تقليد .. فوجئت بضحكتها الصافية وهي تضمني ليها وتدعو لي بالسعادة مع سارة ..
ياااااخبر .. ماما بتغير عليّ؟؟؟

قــالت ســارة:
"بيتزا للآنسة سارة .. العريس باعتهالك"
دوت الجملة فى مركز التجميل كالرصاصة، وصاحبَتها همسات وضحكات مكتومة من بقية العرايس معناها: شايفة عريسها بيحبها ازاي؟
غرقت فى الخجل من نظرات الجميع .. وفتحتها وأنا اتذوق أغلى وألذ بيتزا أكلتها فى حياتي ..
بجد من يقولون أن الحب أهم ما في الحياة لا يعرفون شيئاً .. أهم ما فيها هو الحنان
..
[/justify]

انتي فين يا هيام لسة شوية الخطوبة
الحلقة اللي جاية ان شاء الله نحضر مع بعض الشيكولاتة والتورتة
معلش انتي عارفة ترتيبات الخطوبة بتاخد وقت
عقبالك يارب وكل بنات المنتدي

لالالالالالالالالالالالالالالالالا

بجد حرام عليكي

كده تخليني ادخل بالتورته والورد مش الاقي حاجه

طيب اودي الحاجات دي فييييييين بقي

انزلي بقي بحلقه الخطوبه

قبل ما اقضي علي التورته

ههههههه

الحلقة التاسعة من يوميات عمر وسارة 271898

تسلسل احداث جميل ومتميز جداااااا
تسلم ايدك يا هدير
بجد حلوة اوووى
ومتابعين