التغيير شئ أساسى

بسم الله الرحمن الرحيم
التغيير شئ أساسى..
.................

كإنسانة مسلمة أؤمن بمبدأ التغيير..والتغيير لايحدث إلا إذا كان نابعاً من الداخل..

فإذا أردت حدوث تغيير بالكون وبمن حولك كون أنت ذلك التغيير ولا تنتظر أحد يملى عليك ماتفعله.. لأنه لابد أن يكون نابع من داخلك.. وإذا لم تنجح فى تحقيق ما تتمناه لاتغضب ولاتيأس ولاتسميه فشلاً.. لأن الفشل هو بداية اليأس والدخول فى حالة ضياع الحلم والبدء بكلام ليس له فائدة سوى زيادة تأنيب نفسك كقول لقد فعلت أقسى مافى جهدى والنتيجة صفر..

ولكن دعونا نطلق على تلك المرحلة سقوط الطفل..لأن الطفل فى بداية عمره يتعلم كيف يمشى وبالطبع لا يمشى من أول مرة ولكن مرة بعد مرة وبإصرار يتعلم المشى..

هكذا هى تلك المرحلة فإذا لم ننجح نكون قد سقطنا سقوط الطفل فنعاود الوقوف مرة أخرى لا الإلتزام بالسقوط...

قل للفشل لن أيأس ويكفينى شرف المحاولة..

قل لمن حولك إنك بيدك أن تغير الكون..

ترجم أقوالك لأفعال حتى لا تكون مخادع كبير لنفسك قبل الناس..

ضع أمامك أمثلة تدعوك وتدفعك للنجاح وأهم شخصية هى سيدنا محمد صلى الله عليه وسلم إقرأ كثيراً عن سيرته ستجد الكثيير والكثيير الذى يدفعك للأمام..

إقرأ للدكتور إبراهيم الفقى فكتبه قد أثرت فىّ..

إستغل كل فرصة تأتيك وتستشعر من خلالها إنها هدية من الله سبحانه وتعالى..

قال عمر بن عبد العزيز: إن لى نفس تواقة تمنيت يوماً أن أتزوج فاطمة بنت الخليفة فتزوجتها وتمنيت أن أكون والياً على المدينة فصرت والياً على المدينة وتمنيت أن أكون

خليفة فصرت خليفة للمسلمين وأنا الآن أشتاق إلى الجنة ..

فعاش يعمل للجنة..

الموضوع ليس مجرد تغيير فقط بالكلام أو مجرد أحلام أعيشها لحظات ثم يوقظنى الواقع المؤلم.. الموضوع نية جادة وهدف وعمل..

لن يكون هناك تغيير إذا لم يكن نابعاً من داخلنا..ولن يكون للتغيير قيمة إذا كان هناك من يحركنا فلابد أن تكون سيد قرارك لكى تكون لك أفكار جديدة تفيد من حولك من شباب أمتنا التائه..

كل ماأتمناه هو أن كل شخص منكم يبحث عن مواهبه وعن قدراته الكنز المفقود بداخلك وإبحث عنه وإكتشفه وإستغله فى رضا ربنا

فى الختام أحب أن أذكر موقف ..

قبل وفاة النبى صلى الله عليه وسلم بكى وقال للصحابة إشتقت لإخوانى..

فالصحابة قالوا: أولسنا إخوانك يارسول الله؟

فقال حبيب قلوبنا:لا.. بل أنتم أصحابى..وإنما إخوانى هم قوم يأتون من بعدى ويؤمنون بى ولم يرونى..

أعتقد أن دموع سيدنا النبى صلى الله عليه وسلم غالية علينا أووى وتستاهل أننا نقرر نتغير للأحسن وأسألوا نفسكم سؤال

هل إحنا نستاهل دموع النبى وإشتياقه لينا؟

عاشقةالقدس..

حبيبتى عاشقة القدس موضوعك جمييل اوووى
وفعلا ان الله لا يغير ما بقوم حتى يغيروا ما بانفسهم
احنا ما ينفعش كل واحد واقف فى مكانه ويقول يارب اصلح لنا حالنا
لازم احنا نتغير علشان الدنيا اللى حوالينا تتغير
حنتغير للاحسن فى سلوك ومعاملات واخلاق الدنيا بجد حتبقى اجمل
جزاكى الله خيرا حبيبتى
بس سؤالك الاخير ده بجد صعب اوووى
هل احنا نستاهل دموع النبى واشتياقه لينا ؟؟
صلى الله على محمد صلى الله عليه وسلم
انا قعدت افكر كثير اوى فى السؤال ده بس حتصدقينى لو قولتلك ماعرفش
فى مننا يستاهل وفى مننا لاء
بس ممكن كلنا نكون نستاهل لو اشتغلنا على نفسنا شوية وطبقنا كلامك فى التغيير
وكل واحد منا حاول انه يكون احسن
وربنا يعينا جميعا ويصلح قلوبنا يارب
بارك الله فيكى حبيبتى
بحبك فى الله

جزاكى الله خيراً حبيبتى مريم على مرورك وردك الكريم
إسمحيلى أقولك حاجة موجودة فينا للأسف
هو إننا بنعشق حاجة إسمها الكلام
لكن تيجى على أرض الواقع مش هتلاقى فعل خالص
إلا طبعاً من رحم ربى
إحنا للأسف مش بنحب نتغير غير لما إللى قدامنا يبدأ
دايماً بنستنى حد يبدأ مش بنفكر أبداً إننا إللى نبدأ
مع إننا فى كل مجالات الحياة عندنا عباقرة مسلمين
بس محدش بيحب يفكر أو يعترف بالناحية الإيجابية
وتلاقى الكل يقولك أنا بحب ربنا ويحب الرسول
طب إيه إللى يثبت؟! إيه إللى يثبت حبك لربنا؟
كلنا بنحب ربنا
بس ماينفعش نقعد كده إحنا مش جايين عشان ناكل ونشرب ونتجوز ونخلف ونموت وبس
فى رسالة فى هدف إنت إتخلقت عشانه
بالنسبة لسؤالى هو صعب بس لازم نفكر فيه
أنا فكرت فيه ولقيت إنى ماأستهلش ولا ذرة من دموع النبى الشريفة
أنا ماعملتش حاجة عشان أستاهل دموعه وإشتياقه لينا
ربنا يبارك فيكى يامريم
اللهم إستخدمنا ولا تستبدلنا
اللهم إستخدمنا ولا تستبدلنا
بحبك فى الله

للاسف انتى وضعتى يدك ع الجرح أننا عندنا القدرة ع الكلام ولكن حينا يحين وقت التنفيذ فلانفعل شئ
تقصير مننا وعدم تحمل المسئوليه
ربنا يرحمنا برحمته ونستيقظ قبل فوات الأوان
سترنا الله وإياكم وبارك لكى حبيبتى نورا

بجد مواضيعك رائعه رائعه رائعه
ربنا يعزك يارب
سؤالك
هل إحنا نستاهل دموع النبى
وإشتياقه لينا؟
تعرفى انى كل شوية افتكر موقف الرسول صلى الله عليه وسلم لما بكى لأشتياقه لينا يااااااااااه ادايه بيحبنا واحنا مانستاهلش دموعه دى انا بتكلم عن نفسى لأنى اول واحده مقصره معاه جدا جدا جدا
يارب استخدمنا ولا تستبدلنا
اما عن موضوعك التغير شىء اساسى فى حياتنا ولازم التغير يكون من ايراده الانسان نفسه وفى كل واحد فينا ليه هدف عايز يوصله يحاول مره واتنين وتلاته لا ييأس انما تلاقى معظم الشباب اقرب مثال فى فرص العمل تسأليه انته مااشتغلتش ليه يقولك هو فيه شغل ومااشتغلتهوش يعنى كأن الشغل هيجى لحد عنده امال فين الايراده والحماس وان لو الشغل ماجاش لحد عندك روح انته ودور عليه واسعى وراه ومع التوكل على الله عزوجل وايرادتك انك تتغير وتلاقى شغل ان شاء الله سيحدث
فبجد الانسان لوعايش لهدف معين هيقدر يوصله بس لازم يعرف هو عايز ايه
جزاكى الله كل خير حبيبتى

جزاكم الله خيراً إخوتى سالى ومى
على مروركم الكريم
ومى بالنسبة لكلامك و الله حال شبابنا إللى مش بيشتغلوا واجعنى جدا
لأن للأسف معظمهم مش عايزين يتدرجوا فى الوظايف عايزين يشتغلوا وظيفة كبيرة على طول
عشان كده محدش بيشتغل عشان مش راضيين بالقليل و بالتالى هيقعدوا فاضين زى ما بنشوف
ومش بيحاولوا يفكروا مثلاً فى فكرة معينة يعملوا بيها مشروع يفيدهم
ربنا يهديهم ويصلح حالهم
جزاكم الله خيراً