انا فكرت في فكرة يعني ازاي نفضل فاكرين ربنا طول الوقت و فاكرين رسالتنا في الحياة .. لان الانسان بطبعه بينسى زي ما احنا بنقاوم النسيان في كل امور حياتنا و بنفكر نفسنا بمصالحنا و اشغالنا بكل الطرق و شتى الطرق و دايما بنظبط منبهاتنا عايزين باردو نعمل منبه لنفسنا عشان كل ما ننسى الرسالة نفتكر مش عايزين نسمح لنفسنا ننسى انا بفكر نعمل ورقة .. الورقة دي نكتبها بخط ايدنا ورقة مقاسها مناسب كدة نكتب فيها ( ان الله علي حسيبا .. ان الله علي رقيبا ) و نعلقها في كل مكان ممكن ننشغل فيه عن نفسنا و عن ربنا و كل واحد يشوف فين نقطة ضعفه و يحط الورقة فيها .. اللي مثلا بتفضل ذاكرة طول الوقت بس مشكلتها هدومها محتاقة توسع شوية تعلق الورقة جوة دولابها .. قبل ما تلبس هدومها و هي نازلة تشوف الورقة مكتوبة بخط ايدها ان الله علي حسيبا ان الله علي رقيبا .. اللي نقطة ضعفه الانتر نت و الصحوبية و الشات .. يحط الجملة دي خلفية للديسك توب عنده على الكمبيوتر عشان ميسمحش لنفسه انه ينسى ابدا .. واللي مشكلته و نقطة ضعفه مكاملات الموبايل باردو يحط الجملة دي خلفية للموبايل .. هو كدة الانسان ممكن يبقى منبه و مذكر لنفسه .. مش عايزين نسيب نفسنا للنسيان .. مش عايزين نتراجع او نفرط في حق ربنا بسبب النسيان .. انا جربت الطريقة دي مع نفسي و نجحت نسبيا و بجد في حاجات كتير فرقت معايا و اتغيرت و بتمنى ان كلنا نجربها لازم كل انسان يعمل لنفسه حاجة تفكره مش لازم نكتب نفس الجملة اللي ذكرتها .. كل انسان فاهم نفسه و عارف ايه اللي ممكن يردعها و يرجعها للطريق الصح ممكن تكتب ورقة و تذكر نفسك دايما بالقبر .. بالموت .. بيوم القيامة .. اي حاجة المهم تكون الحاجة دي ليها تاثير عليك جدا و لما بتسمعها بترجع عن اي معصية .. لازم الورقة تفضل ادام عنينا طول الوقت تعلقها على الحائط اللي فوق جهاز الكمبيوتر بتاعك .. تعلقيها جوة دولابك .. حتى في مكان شغلك .. مش حنسمح لنفسنا ننسى .. يبقى ازاي بقى حنعصى .. ياريت لو الفكرة عجبتكم تنشروها اكتر وسط اصحابكم و اخواتكم بجد يا جماعة عايزين دايما نفضل فاكرين ربنا .. لا ن مشكلتنا دايما اننا لما بنعصى او نغلط ما بنبقاش قاصدين و دايما بنعصى عشان ناسيين احنا بقى مفروض نقاوم النسيان دة لحد ما يبقى طبع فينا اننا دايما فاكرين
معلش انا اتكلمت كتير استحملوني بس واللهل لاني فعلا جربت الموضوع دة و حاسة انه بفضل الله فرق معايا جدا .. دة انا مش عايزة اقلكم على حاجة كمان بفكر اعملها مش حتصدقوها ( الكفن ) دي مش فكرتي بصراحة انا سمعت شيخ اتكلم عنها انه الانسان عشان يفضل دايما ذاكر و خاشع و حاطط ربنا امام ناظريه انه يشتري كفن و يحطه في الدولاب بتاعه و يحطه وسط هدومه لانه متاكد انه دة الحاجة الوحيدة اللي حيستعملها فعلا عاجلا ام اجلا يعني ممكن الاجل ينتهي قبل ما يلبس القميص دة او قبل ما تلبس الفستان دة لكن الكفن حيتلبس حيتلبس لا محالة .. هي دي طريقة تانية للتذكير بس صعبة شوية عايزين بس نبدا بموضوع المنبه البسيط و بعدين نبقى نوصل للكفن على خير
سامحوني تاني عشان اتكلمت كتير بس والله كنت حابة تشاركوني مش اكتر
ربنا يكرمكم و يجازيكم كل الخير
.
موضوع: مش حنسى ربنا 
الأحد 10 أبريل - 7:21
