بسم الله الرحمن الرحيم..
من أجمل مقالات أ/محمد وأقربها إلى قلبى.. هتحبوها لما تقرأوها هى قديمة شويتين بس ملهاش حل..(عاشقة القدس)
هسيبكم مع المقالة بقى..
بسم الله والصلاة والسلام على رسول الله....
اصل انا مبتكلمش ايطالى....
(قعدة بحر)
ده مقال خفيف كده من المقالات اللى بندردش بيها مع نفسنا..وكمان كان مناسب للمكان اللى نزل فيه...
قعدة بحر صغيرة ....بس على فكرة....
كلها احداث واقعية...
الفصل الاول والاخير....
اكتر حاجة بيحبها اهل اسكندرية انهم يفضوا كل همومهم على البحر...ودى حاجة من اهم الحاجات اللى انا شخصيا بحبها...وخاصة طبعا فى الشتا....
او لو كان الوقت متأخر شوية....
هى صحيح دلوقت اصبحت زى مغامرات السندباد من كتر اللى انت بتشوفه وتتعلمه وانت ماشى...ولكن حتعمل ايه بقى..اللى بيحب العسل يستحمل قرص النحل زى مابيقولو...
قلت النهردة اخليكم تشاركونى فى كام قرصة كده..قصدى رحلة سندبادية...اوووو,...اسف اسف..اقصد تمشية على البحر....
ابتدت المغامرة..باغرب حاجة ممكن تحصل لحد ...(ده من سذاجتى يعنى انى كنت متوقع كده) ...
خاصة طبعا لو من وجهة نظر الناس يبان عليك شكل الملتزم...
اول خبطة فى دماغى...شاب وقفنى......لو سمحت يامان....محل !!!!! فين...؟؟
بالنسبالك دلوقت ممكن يكون سؤال عادى...لكن لما تعرف ان اللى سال عليه ده طلع ايه...طلع محل خمور..مش عارف يبقى ايه شعورك...
كده..هى بقت عادى...طيب اقوله على المحل..ولا اقوله كلمتين نصيحة...نصيحة ايه..هو لو فايق اصلا على راى صاحبى مكانش جه سال..
المهم لقيت نفسى ببص حواليا كده..مش عارف دى كانت صدمة ..ولا بوادر ازمة قلبية ولا ايه...حسيت انى فى حتة غير بلدى....وبعدين لقيتها طلعت لوحدها كده..من غير حسابات...
قلتله..معلش.....(اصل انااااا مبتكلمش ايطالى....)
والله ماكان قصدى هزار ولا ضحك ولا استهزاء..هى طلعت كده...
سييبته ومشيت شوية...وعلى نفس الرصيف رغم بعد المسافات...جه وقت تانى خبطة...
الناس بتوسع اللى واقفين...والدنيا كلها بترحب بحد...انا قلت حاجتين..
يا المحافظ...(واتصور معاه بقى)...يا حد بقى من علماء الامة الكبار وائمتها...اصل دول اللى احنا خدنا فى المدرسة ان لازم نحترمهم....ولاة الامر..ورجال الدين...
ماعلينا...
وسع يابنى..اتفضلى ياهانم..ازيك يانجمة...ست الكل...ايه القمر ده ياستار...بالتوفيق يانجمة....
القى نظرة كده على صاحبة المهرجان ده...اذ افوجأ بالنجمة....راقصة درجة تالتة من اللى بتشتغل على كازينو فى البحر...
يانهار اسود....المهرجان ده كله عشان النجمة.....(مستغرب انا بقى)...
لقيت نفسى ببص لصاحبى وبقوله ..
معلش..مش ذنبى....اصل انااااا مااا مااا مببب مبتكلمش ايطالى...
ماعلينا..نخزى الشيطان وقلت انقل الجنب التانى...جنب البحر والهدوء واسيبنى من الكلام الفارغ ده...
وياريتنى مانقلت..لان يظهر ان كان لسة الوقت بدرى...
وبدرى ده اللى هو مثلا الساعة 12.........
شفت كل حاجة ممكن قلبك ينفرها..ده لو لسة فى قلوب عندنا ...
ايوة..ايوووة..هما اللى فى بالك....
الخاينين والخائنات....
يااااا...من كل شكل ولون...الغنى والفقير....الصغير والكبير..الابيض والاسود...
طبعا للوهلة الاولى تظن انى بتكلم على موسم الحج مثلا...
لكن لا ..ده كان زمان...
على فكرة ياحبيبى..مش بتكلم على صلاة.....ولا على تكافل اجتماعى...
ده انا بتكلم على حاجات بتحصل فى بلد مسلمة...
بس خلى بالك ليها العذر...عشان عايشة حالة حرية...اه اه نسيت.....وانفتااااح...
وبعدين...انا بقى...(حالة استغراب رهيبة) ..اول مرة تجينى رغم انا المناظر بتتشاف كتير اكيد..بس يمكن لتوالى الاحداث...
احنا فين يااخوانا...هو فى ايه...
الولد الصغير..اللى لسة متكونتش عنده اى ملمح من ملامح الرجولة...ماشى مع البنت الصغيرة اللى قتلت ملامح البراءة فيها بدرى...
الشاب الكبير العاقل...او قول الديب..اللى مهزىء كرامة (صاحبته) اللى هى اخته ولحمه ودمه ودينه..وخلى شكلها وحش قدام اللى رايح واللى جى...وسايبلها ذكرى سودا فى حياتها...
البنت الخاينة..اللى بتضحك على ابوها..واخوها....وخانت زوجها قبل ماييجى..وكل ده عشان تسمع كلمتين هايفين من شاب هايف...
لقيت نفسى متلجم...ومش عارف اتكلم...
عارفين ليه.....؟؟؟
اصل اناااااا مبتكلمش ايطالى...
شفتوا الحرية وصلتنا لايه....
قلدوا قلدوا..وعيشوا حياة الانفتاح..وحياة الغرب كمان وكمان...
بالمناسبة..ارخم كلمة ممكن تسمعها...(انا بابى مربينى كويس وواثق فيا.....او...انا بقول لمامى كل حاجة وعارفة كل حاجة عنى...)
هما لو مش عارفين اللى بيحصل تبقى خيانة وكارثة...ولو عارفين تبقى مصيبة سودة...
هو مش موضوعنا بس زى بعضو....ماهو اصل انا مبتكلمش ايطالى....
ما علينا...
شفت كتير اووى...بصيت للبحر..وقفت اتكلم معاه واسرح فيه شوية....
قلتله يااااا..انت صابر علينا اوى....
ربنا مصبرك علينا عشان هو رحيم بينا....
لكن انا عارف ان انت مش قادر تصبر على اللى بيحصل حواليك....القهار قاهرك وماسكك عشان تصبر...
يمكن يتوبوا ....
انت عايز تنقلب علينا وتغرقنا ..صح...
والله عتدك حق...بس انت مسكين زينا...مش بايدك حاجة....
الحليم الصبور...مصبرك على عباده المذنبين عشان بيحبهم....
بيحبهم وعايزهم يتوبوا ويرجعوا.....
سامحنا .....معلش ياعم بحر...
عدت على خيالى شوية مواقف فى وسط الكلام....
شفت...
الابن اللى مستهزىء بابوه....
البنت اللى بتزعق لامها...
الزوجة اللى بتخون زوجها وهو فى حضنها ..بالتليفونات والشات...
الراجل اللى مخلى كل حد فى حياته سعيد الا مراته....
الرشوة اللى ملت مكاتبنا...والواسطة اللى بتاخد حق الغلابة...
المسجد اللى بينادى,,,اين احبابى وزوارى...
الشاب اللى بنطلونه واقع منه ولسة مش عارف يجيبه لحد دلوقت...
البنت اللى متعرفش اذا كانت ولد ولا بنت من لبسها المقزز...وشبشبها الصوبع...
الاهل اللى بيرفضوا صاحب الدين عشان فقير وغلبان....
نجوم الجيل اللى ملوا حياتنا..تنطيط وقلة ادب وكلام وقح اباحى...
البدع اللى بقت حلال..والاغانى والموسيقى اللى بقت مباحة (بس لو كانت محترمة خلى بالك)...والخمر اللى حتتحلل قريب...
الحجاب اللى بقى نص كم....ومفيش مشكلة لو كان شعرك باين .....
الفتاوى اللى وديتنا فى داهية وكل حد بقى يفتى..حتى اللى معندهوش ادنى علم....
الاجندة الخارجية اللى بقت بتتملى على دعاتنا ..ومناهجنا التعليمية فى المدارس...
الخيابة وقمة السذاجة اللى تشوفها بقت فى الناس..لما يهللوا ويتحمسوا لحاكم جديد...
ميعرفش هو مين وجاى منين وعايز ايه...حتى اسمه الثلاثى ممكن ميعرفهوش...
والاكبر بقى..انه لسة مرشحش نفسه....
الناس اللى بقت بتاكل حق بعض....حتى لو كان اخ...
كلمة الحب والخير والعطف اللى بقت متطلعش من افواهنا...
الحقد والغيرة والحسد اللى بقت مالية قلوب الناس...
الصراع اللى احنا عايشين فيه..والدنيا الى بقت بتقطع من كل حد فينا حتة...
حتى عمل الخير بقى ماليان مصالح..او فتن....
الناس اللى مبقيتش طايقة بعضها....
البطالة والعنوسة.....اللى اتربطوا علطول معايا بالخليفة عمر بن عبد العزيز...اللى بعد ما كل الناس شبعت..واتجوزت...وبقت عيشتها كويسة..من كتر الاموال الموجودة رمى الحبوب فى الصحرا عشان الطيور تاكل منها وتكون هى كمان سعيدة وشبعانة...
يااااااااااا....لقيت نفسى فى عالم تانى....وكل موقف يخطر ببالى اجريه بسرعة...
واقوله معلش...انا مش فاهم ايه اللى بيحصل....ومش قادر اشرحلك....
عارف ليه..؟؟؟؟؟؟؟؟
(اصل انااا مبتكلمش ايطالى...)
حقول ليكم وليا حاجة...ومتخافوش كلنا حنفهمها....لانها مش ايطالى...
يقول الله تعالى: "وَاتَّقُوا يَوْماً تُرْجَعُونَ فِيهِ إِلَى اللَّهِ ثُمَّ تُوَفَّى كُلُّ نَفْسٍ مَا كَسَبَتْ وَهُمْ لا يُظْلَمُونَ" (البقرة:281)
ياااااااااااااااا.....حسيت انها دليل لكل حد..ونصيحة تنفع لاى حد....
وكمان حق راجع لكل حد اتظلم..او اتخان.....
يالا نفوق بسرعة ونلحق نفسنا......
اصل انا كمان فوقت ورجعت من الرحلة.....
فوقنى صوت اذان صلاة الفجر....
قلت لصاحبى يالا نصلى وبعدين توصلنى بعربيتك......بقولك...معاك مصحف فى جيبك....
قالى ..
مصحف..وف جيبى....يانهار ابيض...وكمان اوصلك بعربيتى...طيب وعشمان اكتر م اللازم انت..
لاااا بقى معلش....اصل انا مبتكلمش ايطالى......
(اصل انا مبتكلمش ايطالى)
مقال أ/محمد طه..
.
موضوع: أصل أنا مبتكلمش إيطالى!! 
الثلاثاء 7 يونيو - 6:48
)