كيف تكون داعى إلى الله؟

* بسم الله الرحمن الرحيم*
--------------------------

*كيف تكون داعي إلى الله؟*
-----------------------------

إترددت كتيير قبل ماأكتب الموضوع ده..
ونفس التساؤل بخصوص كل موضوع عامى ولا فصحى..
وكان الإختيار العامية عشان يناسب كل الناس..
أنا مش دارسة فقه..ولا أفقه شئ عن العلم الشرعى..
بس بتعلم..بدور على دينى عشان أتعلمه وأعلمه للناس..
بأى طريقة..سواء كان فى إطار كتابات زى مابعمل..
أو إبتسامة..أو كلمة أقولها لحد محتاج نصيحة..
أو موقف أتعمد أعمله عشان توصل رسالة معينة لشخص معين..
---------------

سؤالنا..كيف تكون داعى إلى الله؟
بمليووووون طريقة تقدر تكون داعى إلى الله..
وحسب مجالك حسب قدرتك..
بمعنى إنى مجالى إنى أتكلم مع الطلبة بحكم شغلى وكمان أقدر أكتب..يبقى ممكن أكون داعية إلى الله من خلال النقطتين دول..
أقدر أوصل أى رسالة للطلبة..وأفهمهم الدين..
أقدر أكتب نصايح..
غير تعاملاتى مع الناس أهلى أصحابى فى أى مكان..
أقدر أوصل أى رسالة أنا عايزاها توصل للناس..
ومنعاً للتساؤل أنا مش بقول محدش يتعلم علم شرعى وفقه..بالعكس دول أساس الدعوة..
قدرت تتعلم كان بها ..مقدرتش يبقى ماتقفش..
أنا مثلاً مقدرتش أتعلم علم شرعى..أسكت..أبطل..
لا..أقرأ وأتعلم وأسمع وأنفذ..

ياجماعة الدين مش هيدور علينا..إحنا إللى ندور على الدين..
بأخلاقك تقدر تكون داعى إلى الله..
بتصرفاتك تقدر تكون داعى إلى الله..
بإبتسامتك تقدر تكون داعى إلى الله..
بكلمتك تقدر تكون داعى إلى الله..

وخلى بالك من كلمتك..لأنك ممكن تقول كلمة مش واخد بالك منها فتخلى إللى قدامك يكرهك ويكره الدين..
حببوا الناس فى الدين بيكم وبأخلاقكم..
بلاش تكون سبب فى إن حد يبعد عن الدين..
الحاجز إللى الناس خايفة منه لما يقوموا بالدعوة..
إن الناس هتتريق عليك..إنك ممكن تقع فى مشاكل..

طب وإيه المشكلة..؟!

هو سيادتك ناوى تدخل الجنة كده بدون أى مجهود ببلاش يعنى؟!
أساس أى نجاح المشاكل..ولازم تلاقى حد يقف فى طريقك..ده الطبيعى ..
ياما سيدنا النبى صل الله عليه وسلم سمع كلام يتهز له البدن..وأستمر فى دعوته..
ياما إتعرض سيدنا النبى صل الله عليه وسلم لمواقف
وإبتلاءات وأستمر فى دعوته..
ياما جسده الشريف إتصاب ومع ذلك أستمر فى دعوته..
ومش سيدنا النبى بس الصحابة والتابعين وكل الناس..
تيجى إنت ومستكتر حد يتريق عليك..

إذن نبدأ من جديد..
من دلوقتى حدد إنت هتقدر تعمل إيه فى مجال الدعوة..
مش بقولك إطبع منشورات وروح إعمل مظاهرة..
أنا بقولك إثبت إنك مسلم..
إثبت إنك تستاهل إنك تكون من أمة محمد صل الله عليه وسلم..
بكلمة..بُخلق حسن..بإبتسامة..بورقة نصيحة..بكتيب دينى..بهدية بسيطة..بدعوة..تقدر تدعو إلى الله..
قدامك مليوووون طريقة إختار إللى تناسبك وعيش فى عالم الدعوة..
خلى سيدنا النبى يفخر بيك..خليك فعلاً مسلم بمعنى الكلمة..
متكسلش..وجرب ماالدنيا إلا معمل تجارب..

اللهم إنى بلغت اللهم فاشهد..
ولا تنسونا من صالح دعائكم الطيب
---------

بقلمى عاشقة القدس ( نورا)