من غير عنوان !!

**

هيفضل البنى آدم طول عمره شخصية ملهاش تفسير محدد بالنسبة ليا..

ودايماً بيخلينى أفكر وأحلل كتييير فى التصرفات والمواقف إللى بتتغير بناء ً على الشخصيات..

خلونى أناقش معاكم بعض الشخصيات إللى قابلتها فى حياتى ..

أفتكر شخصية من زمان وأنا طفلة كنت منطوية ومحبش الإختلاط والإجتماعيات والأماكن إللى فيها ناس كتيير ومش بحب أتعرف على حد جديد..

الشخصية دى كانت عكسى تماماً تندمج وتدخل فى حوارات مش لازم تدخل فيها .. وكانت دايماً تقولى ( إحشرى نفسك وسط الناس عشان يعرفوكى )

كنا أطفال وقتها على فكرة..
وماكنتش مقتنعة بكلامها وماعملتش بيه ..

بس بعد ما كبرت بقيت إجتماعية نوعاً ما وبحكم إن ربنا جعلنى اخصائية إجتماعية فده ساهم نوعاً ما فى إن أكسر حاجز الخوف إللى بنيته بينى وبين الناس ..

بقيت مش بخاف من الناس زى الأول .. بس لسه لما أتقابل مع ناس أول مرة بسكت مش باخد على الجو غير متأخر..

فى الشغل الجديد بدأت آخد على جو التعامل مع الناس إللى معايا بعد سنة .. كتييير سنة .. بس والله غصب عنى نفسيات غريبة أينعم فقستهم من أول مرة بس إنى أقنع نفسى إنى كل يوم أشوف الناس دى وهضطر أتعامل معاهم ولابد إنى أتكيف معاهم لازم ياخد سنة وأكتر ده كده إنجاز بالنسبة ليا Smile

المهم الغريب بقى إن الشخصية بتاعت مبدأ إحشر نفسك وسط الناس دلوقتى هى إللى منطوية ومش بتتعامل مع حد بالعكس كل ما بنتكلم مع بعض

بتقولى كلام غريب زى إن الناس بتحبنى أكتر منها وإنها سمعت كده من كذا حد .. بقولها وقتها حاولى تظهرى عشان الناس تفتكرك وتحاول تتأقلم معاكى

وكأنى أنا إللى بقولها دلوقتى إحشرى نفسك وسط الناس !! سبحان مغير الأحوال والله ..

الشخصية دى منغلقة على نفسها لحد دلوقتى وبحاول معاها بقدر الإمكان أخرجها من الحالة دى وربنا المستعان..

شخصية كمان برغم العلم والدين والفهم إلا إنها بتظلم ناس غيرها بالمعاملة بسوء الظن بغيره ..

وخلونا بس نكون متفقين إن أى شخصية شيخ أو غيره مهما كان على قدر من العلم طبيعى إنه يغلط لإننا مش معصومين من الخطأ..

أنا بس إستغرابى من إنى أنا دلوقتى عرفت إن الحاجة دى حرام أعملها ليه ؟!

إزاى أمثل على ناس التدين وأنا فى نفس الوقت ببهدل ناس تانية متناسية التدين إللى كنت فيه مع غيرى ؟!

how come ؟ إزاى يعنى ؟!

ربنا رزقنى بمعرفة فى الدين أو العلم يبقى أعامل كل الناس كده سواسية ..

مش أظلم ناس وناس لأ..!!

فى شخصية كمان عصبية وتحب التحكم.. وتحب تعمل الغلط وعلى إستعداد إنها ماتحكيش لحد عشان محدش يقولها إن ده غلط برغم إنها مدركة إنه غلط

شخصية عايزة حد يحللها الغلط ..حد يوافقها على الغلط ..!!

شخصية الوشوش .. بمية وش .. دى بقى بمبهر فى كل موقف بتعمله .. لأنى فى كل تصرف بكتشف إنى لسه ما إكتشفتش حاجة فيها ..

شخصية غريبة بقى .. قاسية جداً.. برغم حنيتها .. بس عمرها ماتظهر حنيتها .. وأتوقع إنها مش هتتغير غير لما تفقد حد قريب منها جداً ..

شخصية إللى بيبقى فاهم كل حاجة وتقريباً بيكون فاهم كل حاجة غلط..ده حقيقى بيصعب عليا .. لأن معظم تفسيراته عن الناس إللى بيتعامل معاها بتبقى مش صحيحة بس هو عايش دور إن هو وحده الصح ومحدش فاهم الدنيا غيره.. غير إنه أوقات بيكون شرير بدرجة بشعة وحش بياكل إللى قدامه ..
وبيظلم غيره..وبيفرح ويشمت فى غيره..

شخصية السوسة ..يبقى فاهم كل حاجة وساكت .. وعامل نفسه مش فاهم بس هو سوسة جداً وفاهم كل حاجة وكل تصرف...

فى شخصيات كتيير إتعاملت معاهم دول منهم .. مش متذكرة الباقى..

بس يفضل البنى آدم يبهرنى كل مرة فى تصرف .. ودايماً تصرفاته بتبقى أسوأ من إللى قبلها !!

--------

من غير عنوان !! 472170

عاشـــقة القــــدس