يالا بقي نشتغل بجد لغزة(للامة)

انا
بفكر لما اموت واقف اودام ربنا ويكون واقف امامي بتاع كام الف فلسطيني كلهم مصابين واللى رجله مقطوعة واللى فاقد عينه ذي الطفل لؤى واللى رجوله الاتنين راحت هو لسة طفل برىء ذي الفتاة اللي اسمها جميلة وغيرها...ويكونوا واقفين منتظرين ربنا يحاسبني وياخدلهم حقهم هقولهم ايه؟
هقول لربنا ايه؟
هقوله لا يا رب...ما انا كنت بتفرج علي النشرة وبعيط...لا وأيه ساعات بنحر في قلبي من العياط...مش بس كده...ده انا سعات
ادعيلهم...ده أخري....لا وأيه بروح أشتري منتجات أمريكية ويهودية عشان اتسلي بيها وانا بعيط .
طب كفاية بقه لأن ربنا هيحاسبنا كلنا علي سكوتنا ده
حتي لو اتحججنا وقلنا ان قرارنا مش في ايدنا وان اللى حاكمنا سجنينا
لازم تعمل واجبك
اسرائيل مش عبء عليك...اسرائيل امتحان ربنا بيمتحنا كلنا فيه
احذر ان يأتيك الموت وانت لم تفعل شيئا سوى العويل
بصوا يا جماعة في 6 خطوات سمعتهم في شريط رائع
اللى هيقدر يعملهم او يعمل جزء منهم هيكون وفا جزء من الدين اللى عليه
ولما يقف بين ايادي ربنا هيقول يا ربي برغم تقصيري فانا عملت كذا و كذا
1- تحريك القضية لحمايتها من النسيان، والتذكير بها فى كل الدوائر المتاحة.يعني ايه
يعني دي مهمة كل شخص...انه يحاول يعرف الناس بالقضية ويحاول يتكلم ديماً ويتناقش في القضية دي حتي لو مع اسرته او مع اصحابه او مع سواق التاكسي اللى هو راكب معاه...يعني ديما نحاول التذكير بالقضية عشان متتنساش وعشان منتعودش علي منظر الدم والقتل والتشريد ونيجي بعد شوية كده ...بعد ما كنا بنعيط ...نقول لا حول ولا قوة إلا بالله اقلبلنا يا ابني وهاتلنا ميلودي افلام الواحد زهق من المناظر دي
كل واحد عنده موبايل ومعاه رصيد مليان شوية يبعت رسالة تذكير او دعاء او غيره او معلومة واكيد ده كله بيضاف لحسناته... ورصيده اللى بيخلص ده بيزود رصيده عند ربنا
اي واحد عنده مدونة يحاول يكتب ديما فيها عن القضية لانه هيتحاسب عن اي حاجة بيكتبها فيها...وبيتهيقلي عيب اوي ان تكون غزة بتعاني واحنا نروح نكتب حجات عن الماتش و عن فيلم الامبولأ ونسيب القضية الحقيقية
ولو مش بيعرف يكتب في السياسة ممكن يستعين ببعض المواضيع اللى اتكتبت عند مدونة واحد زميله وينشرها عنده ويقول ان البوست منقول...مش عيب
كل واحد عنده ايميل يبعت رسايل تذكيريه في اوف لاين للناس اللى عنده عشان ميكونش فالح بس في تضييع وقته في الشات والكلام اللى بيضيع الوقت
وكمان الناس تبعت ايميلات فيها صور وكام تعليق للتذكير او تبعت معلومات مفيدة عن القضية
بس في نقطة هامة.
تحريك القضية لابد ان يكون بالمفاهيم الصحيحة....يعني مجيش انا واحد مش فاهم حاجة واروح اسمعلي كلمتين من واحد عميل ولا واحد مش فاهم حاجة راخر ويجي يقولي ان فلسطين تستاهل وانها اصلا اللى باعت القضية وان بسبب خلافات حماس وفتح خليهم ياخدوا علي دماغهم هما اللى عملوا كده في روحهم والكلام ده
لا
انا لازم اقرا كويس ومن اماكن موثوق فيها...لو انا حد مش عارف حاجة عن القضية وجالي اوف لاين او ايميل فيه كلام عن القضية اقراه ومكسلش لاني مينفعش ابقه عامل ذي كوز الدرة اللى كل واحد ما يسألنى حاجة اقوله معرفش وقولي انت والكلام الخايب ده
كمان لو لقينا برنامج بيتكلم عن القضية اعد اسمعه وافهم ...مش عشان حد...بس عشان نفسي...عشان مبقاش واحد معندوش ثقافة ولا فاهم اي حاجة في اي حاجة ولو حد جه يقولي ان مصر دي اصلا في الاصل ارض يهودية هقوله ايوة صح عندك حق2- قتل الإنهزامية وعلاج الاحباط، ورفع الروح المعنوية وبث الأمل من جديد في النفوس
الغريب والعجيب اننا يا مسلمين يجيلنا احباط بسبب الواقع المحيط
لازم نقتنع ان لله سننه في الارض "تلك الايام نداولها بين الناس"...يعني هي دي سنة الحياه...اننا نعيش ايام ذل وهوان الايام دي... وغيرنا يعيش في عزة
ذي ما في وقت من الاوقات عشنا ايام عزة وكرامة وغيرنا داق الذل والهوان

ولازم نعرف ان الامة دي ليها طبيعة مميزة تميزها...امه قد تضعف ...قد تتعرض لنكبات...ولكنها لا تموت ... فهى تبقى لانها تبقى الكلمة الاخيرة لله في خلقه ...ولانها لو ماتت فستكون هذه نهاية الكون

ولازم نفهم حقيقة البشرى في كتاب الله وسنته (وكان حق علينا نصر المؤمنين)
ألا إن نصر الله لقريب
ولو نظرنا للتاريخ هنجد اننا ما نصرنا في تاريخنا إلا بأعداد قليلة وما سقطنا إلا وكان لنا قيام...فبعد موت الرسول مثلا كان هناك ردة عظيمة...ولكن الامة بعد ذلك اشتدت قائمتها...بعد غزو الصليبين مثلا انتصر صلاح الدين...بعد غزو المغول انتصر قطز
الواقع ليس هزيمة فقط....فلقد انهزم الروس في افغانستان وفي الشيشان ... إنتشرت الجاليات الاسلامية....انتشر الحج والعمره....إنتشار الاسلام برغم الحرب الاعلامية التي شنت عليه...إلخ
وكل ده بيثبت ان نصر الله قريب ولكنه يبتلينا ويظهر من الصالح ومن الطالح...فلله حكمته فى ذلك
والنصر لا ياتي إلا بعد لحظات الجهاد الشديدة وعندما يصل الألم إلى أقصاه...وعندما يتسائل المؤمنون "أين نصر الله".... فتكن الإجابة إن نصر الله قريب.
عشان كده مهمة كل مسلم رفع الروح المعنوية لذويه لانه لا ييأس من رحمه الله إلا الكافرون ولازم كل المؤمنين يبقه عندهم يقين في الله شديد بلا ريبة ولا شك
وليعلم كل منا أن أجره عند الله لا يرتبط بنصر ولا بهزيمة
وإنما الجزاء من جنس العمل
فجزائي عند ربي بعملي

3- التبرع بالمال...
في الهلال الاحمر او نقابات الاطباء والهلال الاحمر في القاهرة عنوانه 29 شارع الجمهورية عند محطة حسني مبارك او احمد عرابي اتبرع بملايات هدوم ادوية قطن شاش فلوووس....
فما أحوج أهل فلسطين للمال الان.أثبت صدق كلامك بالتبرع...مينفعش نعد نقول لا ومينفعش وغزة القلب وغزة الفشة تحيا غزة وكلنا غزة...ووقت ما نقولك طلع طيب خمسة جنية لغزة تعمل فيها مسمعتش..
من جهز مجاهدا فقد جاهد
فى فلسطين بيدفعوا ارواحهم لله...وانت قاعد في بيتك وتحت الغطا وبنطلب منك تدفع اموالك لله....بيتهيقلي نرضا بجزء العمل اللى اتقسملنا4-

المقاطعة....المقاطعة...المقاطعة.
بذمتك يا مؤمن يا موحد...لما تقف بين ايادي ربنا...هتقوله ايه وانت بتشتري المنتجات اليهودية وبتدفع فلوسك عشان تبقه رصاصة في صدر طفلة بريئة
اول ما تبدأ هوجة المقاطعة...تلاقي الناس بتحاول تقاطع...وايه بنقاطع الحجات اللى احنا اصلا مش نعرفها...يعني نقول احنا هنقاطع الجبنة الريكفورد الامريكي اللى احنا اصلا منعرفش شكلها ايه...ونروح نشتري هوهوز واريال وتشيكلش وكادبوري وبيبسي والحياه فل
أنا واحدة من الناس بحاول اقاطع وارجع انسا تاني
بس انا بقول بجد المرة دي نويت انا واسرتي اننا نقاطع بجد وبدأنا فعلاً...وصدقوني هنلاقي بديل لكل المنتجات الامريكية واليهودية وهيكون بنفس الجودة إن شاء الله...وحتي لو مش بنفس الجودة يبقه مفيهاش حاجة لو استغنينا عن جزء من رفاهيتنا عشان ربنا
بجد عوزة اي حد هيكتب تعليقه يسيب وعد لله انه هيقاطع وهيقدر علي المقاطعة ومش هيكسل ولا يتناسي وهينشر فكرة المقاطعةانا سمعت في النشرة فعلا حجم الخسائر اللى اتعرضوا ليها نتيجة ان في ناس فعلا كويسة قاطعت من اول مرة اتكلموا فيها عن المقاطعة ومازالوا مقاطعين
بجد لازم نكلمهم بلغة المصالح اللى مبيفهموش غيرها
لازم نقاطع يا جماعة وبجد
الموت يأتى بغتة...ومن مات قامت قيامته...وسوف نسأل عن ذلك

5- الدعاء لأهل فلسطين بالثبات والنصر.والدعاء من اقوى الاسلحة...ولا يمكن ان نقول عليه شىء سلبي
ولكن الدعاء يرفعه العمل الصالح....ولا يجب ان نستخدمه دون عمل بجانبه
الدعاء ركن اساسي من اركان النصر....ورسول الله لم يترك الدعاء ابدا ولم ييأس منه

مين قالك ان دعاءك بقلب خاشع مش هيحول مسار طيارة يهودية كانت هتقصف طفل برىء ويوقف اصابتها بدعاء صادق
مين قالك انك دعوة منك مش هتنقذ مجاهد فلسطيني وقعت جنبه قذيفة وكانت هتموته

بس ناخد بالنا ندعي والقلب حاضر...ندعي دعاء تضرع وذل لله...ندعي دعاء ليس فيه عجلة وإحباط... دعاء كله ايمان وثقة بالله
نصحي نص ساعة بدري قبل الفجر ونصلي ركعتين قيام لله وندعي فيهم بقلب خاشع وبنية صافية وذي ما قلت ممكن دعوة منك تنقذ حد كان اوشك علي الموت...لأن الدعوة الصادقة ترفع القدر.
والله لا محاله سيستجيب
فهو القائل "أدعوني أستجب لكم"

6- أهم نقطة وهى النقطة التي تشمل كل ما سبق...إصلاح النفس والمجتمع.
محدش فينا سأل نفسه ليه الامريكان واليهود محدش منهم بيكترث بعددنا ولا بيخاف من المسلمين اللى كل مصادر الطاقة والقوة والخيرات عندهم....المسلمين اللى بلغوا 2.5 مليار؟
المسلمون ينهزمون بضعفهم وليس بقوة الكافرين
قال رسول الله صلي الله عليه وسلم واصفاً حالنا وكأنه يرانا
يوشك أن تتداعى عليك الأمم كما تتداعى الأكلة على قصعتها، قالوا أومن قلة نحن يومئذ يا رسول الله، قال: بل أنتم يومئذ كثير ولكنكم غثاء كغثاء السيل ولينزعن الله من صدور عدوكم المهابة منكم وليقذفن في قلوبكم الوهن، قالوا: وما الوهن، قال: حب الدنيا وكراهية الموت"
صدق رسول الله صلى الله عليه وسلم

قال رسول الله صلى الله عليه وآله وسلم :
يأتي زمان علي أمتي يحبون خمس وينسون خمس ....يحبون الدنيا وينسون الآخرة...يحبون المال وينسون الحساب...يحبون المخلوق وينسون الخالق...يحبون القصور وينسون القبور...يحبون المعصية وينسون التوبة...فإن كان الأمر كذلك ابتلاهم الله بالغلاء والوباء والموت الفجأة وجور الحكام.
صدق رسول الله صلي الله عليه وسلم
اللينك ده لينك لمدونة نوتة وقلم...وفيها موضوع رائع عن شبهات حول قضية غزة وحماس والرد عليها...مفيد فعلا وفيه اخطاء ناس كتير بترددها دون علم...صاحب المدونة حاول يبذل مجهود متواضع في توضيح الحقيقة...فعلا من جمالها لازم تدخلوا وتقروها وتنشروها كمان...لأن قضيتنا الاولي هي توعية الشباب الغير واعي بهذه القضية
وده لينك لمدونة رائعة لسة عايش لشاب مصري موجود علي الحدود ومصور فيديوهات وصور وعارضها علي المدونة...فيديوهات واقعية حقيقية لأختراق الطائرات الاسرائيلية الأجواء المصرية وغيرها كتير علي الحدود...علي الاقل ندخل ونعلق عنده ونحمسه ونشجعه لانه بيحاول ينقل الحقايق ويحاول يعمل اي حاجة...عوزين نشجعه ونحمسه


ياجماعة اعذروني لو في اي اخطاء املائية او كتابية

وللامانة ارجو الدعاء للاخت مها زين هي صاحبة المقال والجهد والفكر يعني هو منقول للامانه
من مدونتها انها الحياة ....جزاكم الله كل خير : :(

اخي الفاضل استاذنا محمد طه واختي الفاضل بارك الله فيكما ورزقنا واياكم الفردوس الاعلي والاخلاص في القول والفعل واسئل الله ان يستخدمنا في نصرة هذا الدين ورفعة هذه الامة اللهم اميييييييييين

جزاكم الله كل الخير لمشاركتكم